საქართველოსა და ესტონეთის სამართალდამცავ სტრუქტურებს შორის არსებულ მჭიდრო თანამშრომლობაზე იმსჯელეს და ორმხრივი ურთიერთობების კიდევ უფრო გაღრმავების საკითხები განიხილეს ორი ქვეყნის შინაგან საქმეთა მინისტრებმა.
გიორგი მღებრიშვილმა ესტონელ კოლეგას საქართველოს ევროპული და ევროატლანტიკური ინტეგრაციის პროცესში მტკიცე მხარდაჭერისთვის მადლობა გადაუხადა.
შეხვედრაზე ხელი მოეწერა ევროპული მისწრაფებების სფეროში თანამშრომლობის შესახებ ერთობლივ განცხადებასაც.
დოკუმენტი შინაგან საქმეთა და საპოლიციო რეფორმების განხორციელებისა და ორგანიზებული დანაშაულის წინააღმდეგ ბრძოლის კუთხით გამოცდილების გაზიარებას, ინფორმაციისა და ექსპერტების გაცვლას, ასევე ერთობლივი სემინარებისა და კონფერენციების ორგანიზებას ითვალისწინებს.
გიორგი მღებრიშვილმა ესტონეთის შინაგან საქმეთა მინისტრი ოფიციალური ვიზიტით საქართველოში მოიწვია.