ამერიკის შეერთებული შტატების პრეზიდენტის დონალდ ტრამპის სიძე და შვილი რუსეთის მთავრობასთან დაახლოებულ იურისტს შეხვდნენ - ამის შესახებ ინფორმაცია „ვაშინგტონ პოსტმა“ და “ნიუ იორკ თაიმსმა“ გაავრცელა.

ორივე გამოცემა ამტკიცებს, რომ ტრამპის უახლოესი წრის წარმომადგენლებისა და რუსეთის ხელისუფლებასთან დაახლოებულ იურისტ ნატალია ვესელნიცკაიას შეხვედრა 2016 წელს ივნისში გაიმართა ანუ მაშინ, როდესაც ტრამპი აშშ-ის პრეზიდენტობისთვის იბრძოდა.

ტრამპის სიძე ჯარედ კუშნერმა რუს იურისტთან შეხვედრის ფაქტი უკვე დაადასტურა. მისი თქმით, მოლაპარაკებები სულ ნახევარ საათს გაგრძელდა.

კუშნერისა და დონალდ ტრამპ უმცროსის გარდა, შეხვედრაზე იმყოფებოდა მილიარდერის საარჩევნო შტაბის ყოფილი უფროსი პოლ მანაფორტი. ტრამპის საარჩევნო შტაბის წევრებთან შეხვედრას თავად ვესელნიცკაია არ უარყოფს, თუმცა აცხადებს, რომ მოლაპარაკებებზე ერთადერთი თემა - ამერიკელების მიერ რუსი ბავშვების შვილად აყვანის შესაძლებლობა განიხილებოდა.

„ნიუ იორკ თაიმსი“ კი წერს, რომ რუსი ადვოკატი „მაგნიტსკის კანონის“ წინააღმდეგ გამოდის და მის გაუქმებას ლობირებდა. სწორედ აღნიშნული კანონის მიღების შემდეგ აუკრძალა მოსკოვმა აშშ-ის მოქალაქეებს რუსი ბავშვების შვილად აყვანა. „ნიუ იორკ თაიმსი“ ამტკიცებს, რომ ვესელნიცკაია დაკავშირებულია რუსეთის მთავრობის წევრებთან, რადგან ხშირად მუშაობდა მათ ინიციატივებზე.

ამასთან, ჟურნალისტებს რუსი იურისტის კრემლის მაღალჩინოსნებთან კავშირის დოკუმენტური მტკიცებულებები არ მოჰყავს.

აშშ-ის 45-ე პრეზიდენტი და მისი ადმინისტრაციის წევრები რუსეთთან ფარულ კავშირში არაერთხელ დაადანაშაულეს. ამერიკელი გამომძიებლები დღემდე ცდილობენ დაადგინონ, მოახდინეს თუ არა რუსმა ჰაკერებმა ზეგავლენა 2016 წლის საპრეზიდენტო არჩევნების შედეგებზე.



წყარო: Washington Post; New York Times