„საერთაშორისო გამჭვირვალობა საქართველოს“ მაუწყებლობის შესახებ კანონში შესატან ცვლილებებთან დაკავშირებით მთელი რიგი შენიშვნები აქვს, მათ შორის შესყიდვებისა და სარეკლამო ნაწილში. როგორც ორგანიზაციის მედიაპროგრამების ხელმძღვანელმა ნინო რობაქიძემ აღნიშნა, მათ აქვთ კითხვები სასპონსორო შესაძლებლობებისა და კომერციული რეკლამის ზრდის ნაწილში, კერძოდ, ცვლილებების შემთხვევაში, რამდენად იქნება თავისუფალი მაუწყებელი სასპონსორო გავლენებისგან და რამდენად სამართლიანი კონკურენციის პირობებში იქნება სხვა მაუწყებლებთან, რომლებიც საბიუჯეტო დაფინანსებას არ იღებენ.
რობაქიძის თქმით, ორგანიზაცია პრობლემურად მიიჩნევს საზოგადოებრივი მაუწყებლის სამეურვეო საბჭოს უფლებამოსილების შემცირებას და მენეჯმენტის ფუნქციების ზრდასაც.
რაც შეეხება შესყიდვების ნაწილს, რობაქიძის განმარტებით, იმ შემთხვევაში, თუ ცვლილებების შემოთავაზებულ ვარიანტს მიიღებენ, გაჩნდება მეტი რისკი შესყიდვების გაუმჭვირვალობისა და გართულდება აუდიტის განხორციელება.
„საერთაშორისო გამჭვირვალობა“ მიიჩნევს, რომ აუცილებელია აღნიშნული საკანონმდებლო პაკეტის განხილვაში როგორც არასამთავრობო სექტორის, ისე მედიის სფეროს ექსპერტებისა და მაუწყებლების ჩართვა. ისინი იმედს გამოთქვამენ, რომ საბოლოოდ ცვლილებები ისეთი სახით იქნება მიღებული, რომელიც საზოგადოებრივი მაუწყებლის, როგორც გამჭვირვალე და ანგარიშვალდებული ინსტიტუტის იმიჯს არ დააზიანებს.
„საერთაშორისო გამჭვირვალობა საქართველომ“ საკანონმდებლო ორგანოს წამყვან კომიტეტს საკუთარი კრიტიკული მოსაზრებები უკვე გადაუგზავნა.