ირაკლი ხოფერიას საქმის ერთ-ერთმა მოწმემ, გიორგი (გიგი) ქათამაძემ ჩვენება რადიკალურად შეცვალა,-ამის შესახებ საია-ს თავმჯდომარემ, ანა ნაცვლიშვილმა განაცხადა.
დაზარალებულის ადვოკატი და საია მიიჩნევენ, რომ ჩვენების შეცვლის ფაქტზე გამოძიება დაუყოვნებლივ უნდა დაიწყოს, რადგან მათი თქმით, არსებობს საფუძვლიანი ეჭვი, რომ მოწმეზე განხორციელდა ზეწოლა.
"აუცილებელია, დაუყოვნებლივ დაიწყოს გამოძიება ფაქტთან დაკავშირებით, რადგანაც აუცილებელია დადგინდეს, თუ რამ გამოიწვია ჩვენების რადიკალური შეცვლა, ხომ არ ყოფილა მოწმეზე რაიმე ზეწოლა და მისი დაყოლიება ჩვენების შეცვლაზე",- განაცხადა ანა ნაცვლიშვილმა დღეს გამართულ პრესკონფერენციაზე.
ასევე, როგორც საია აღნიშნავს, ირაკლი ხოფერიას საქმის გამოძიება ჭიანურდება. მიუხედავად იმისა, რომ დაზარალებულმა მოძალადე პოლიციელები ამოიცნო, ამ დრომდე პასუხისგებაში არავინ მიუციათ.
ხოფერია 2017 წლის 16 თებერვალს პოლიციის თანამშრომლებმა პოლიის განყოფილებაში სცემეს და მისგან აღიარებითი ჩვენების მიღებას ძალადობითა და ნარკოტიკის ჩადების მუქარით ცდილობდნენ. ირაკლი ხოფერია მხოლოდ მას შემდეგ გაათავისუფლეს, რაც გაირკვა, რომ ის შეცდომით დააკავეს.
2017 წლის 2 მაისის განჩინებით, ირაკლი ხოფერია თბილისის საქალაქო სასამართლომ დაზარალებულად ცნო.