GWP-ის მიერ პეკინის მარცხენა მხარეს სამუშაოების 60 % შესრულებულია, - ამის შესახებ განცხადება "ჯორჯიან უოთერ ენდ ფაუერის" გენერალურმა დირექტორმა, გიორგი ცხადაძემ განხორციელებული სამუშაოების დათვალიერებისას გააკეთა.

მისივე თქმით, პეკინის გამზირის მარცხენა მხარეს, კომპანიამ სრულად შეცვალა წყალსადენის 1,5 კმ სიგრძის ქსელი, რომელსაც ჰიდროტესტირება უკვე ჩაუტარდა.

გამზირის აღნიშნულ ზოლში ახალი ქსელის გადაერთვება ხვალ დილის საათებში მოხდება. მიმდინარე სარეაბილიტაციო სამუშაოები თბილისის მერმა, კომპანიის დირექტორთან ერთად მოინახულა.

"პეკინის სამუშაოები მიმდინარეობს გეგმურად. შეიცვალა 400-მმ და 160მმ-იანი ქსელები. შეკეთდა 1000-1200 მმ-იანი ქსელები. ეს სამუშაოები დაახლოებით 3 კვირა მიმდინარეობდა და 2 დღეში დასრულდება. კვირის მეორე ნახევარში, ჩვენ უკვე მარჯვენა მხარეს დავიწყებთ სამუშაოებს. ვგეგმავთ, გრაფიკზე ადრე დავასრულოთ, სავარაუდოდ 10-11 აგვისტოსთვის წყალმომარაგების ქსელები სრულად რეაბილიტირებული იქნება", - განაცხადა გიორგი ცხადაძემ.

გამზირის მარცხენა მხარეს, მას შემდეგ, რაც GWP სამუშაოებს დაასრულებს, გზის საფარი დაიგება.