თბილისში კონფერენცია „რელიგიის როლი ქალებისა და გოგონების მიმართ ძალადობის აღმოფხვრაში“ მიმდინარეობს.
სრულიად საქართველოს მუსლიმთა სამმართველოს კავშირი და გაეროს მოსახლეობის ფონდი (UNFPA) ქალთა მიმართ დისკრიმინაციისა და ძალადობის პრევენციის ერთ-ერთ გზად რელიგიური ორგანიზაციების გააქტიურებას ასახელებენ.
როგორც კონფერენციაზე განაცხადეს, ადრეული, ანუ ბავშვობის ასაკში ქორწინება დღეისათვის საქართველოში კვლავ მნიშვნელოვან პრობლემად რჩება.
„ეს საზიანო პრაქტიკა, განსაკუთრებით მოზარდი გოგონებისათვის, უმეტეს შემთხვევაში ისეთი მძიმე შედეგების მომტანია, როგორიცაა სოციალური და უფლებრივი გარიყვა, საზოგადოებისგან იზოლაცია; ხოლო მოზარდობის ასაკში ორსულობისა და მშობიარობის შემთხვევაში - დედისა და ჩვილის ჯანმრთელობის რისკი. ადრეული ქორწინება ხშირად ართმევს გოგონებს სრულფასოვანი განათლების მიღების საშუალებას. უფრო მეტიც, ადრეული ქორწინებისას გოგონები ოჯახში ძალადობის მომეტებული საფრთხის ქვეშ არიან“, - აცხადებენ ღონისძიების ორგანიზატორები.
კონფერენცია გენდერული თანასწორობის, ქალთა მიმართ ძალადობის და ოჯახში ძალადობის საკითხებზე მომუშავე უწყებათაშორისი კომისიის, სრულიად საქართველოს მუსლიმთა სამმართველოს, კავშირი „21-ე საუკუნეს“ და გაეროს მოსახლეობის ფონდის საქართველოს ოფისის თანამშრომლობით იმართება.
კონფერენციას ესწრებიან ქვეყნის საკანონმდებლო და აღმასრულებელი ხელისუფლების, სრულიად საქართველოს მუსლიმთა სამმართველოს სასულიერო პირები თბილისიდან და საქართველოს რეგიონებიდან, რელიგიათაშორისი საბჭოს წევრები, საერთაშორისო და ადგილობრივი ორგანიზაციების და დიპლომატიური კორპუსის წარმომადგენლები.