რუსეთში აშშ-ის მომავალი ელჩი ჯონ ჰანტსმანი იქნება. ჰანტსმანს ამ პოსტზე ამერიკის პრეზიდენტი დონალდ ტრამპი რამდენიმე საათში ოფიციალურად წარადგენს. ინფორმაციას სააგენტო „როიტერი“ თეთრ სახლზე დაყრდნობით ავრცელებს. იუტას შტატის ყოფილი გუბერნატორი უკვე ორჯერ დასახელდა ამ პოსტზე მთავარ კანდიდატად - პირველად მარტში, შემდეგ კი, ივლისში. პრეზიდენტის წარდგენის შემდეგ, ჰანტსმანის კანდიდატურა შეერთებული შტატების კონგრესმა უნდა დაამტკიცოს.

ჯონ ჰანტსმანი 1992-93 წლებში სინგაპურში ამერიკის ელჩის პოსტზე მსახურობდა. 2005-2009 წლებში იუტას შტატის გუბერნატორი იყო. 2009-2011 წლებში კი ჩინეთში ამერიკის დიპლომატიურ მისიას ხელმძღვანელობდა. ცნობილია, რომ დიპლომატი ძალიან კარგად ფლობს ჩინურ ენას. 2011 წლის მაისში, ჰანტსმანმა განაცხადა, რომ ამერიკის პირველი პირის პოსტისთვის აპირებდა ბრძოლას. 2012 იანვარში კი, გადაიფიქრა, მარათონს გამოეთიშა და მით რომნის ღია მხარდაჭერა გამოუცხადა. წინასაარჩევნო კამპანიის დროს, ის საკმაოდ კრიტიკული იყო რუსეთის მისამართით და შეცდომად თვლიდა ურთიერთობების გადატვირთვის პოლიტიკას.