საპარლამენტო უმრავლესობა მზად არის, ინტერპარტიული ჯგუფის შემოთავაზება მიიღოს და საკონსტიტუციო ცვლილებების პროექტი არასაპარლამენტო ოპოზიციასთან განიხილოს. ამის შესახებ ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარის პირველმა მოადგილემ გედევან ფოფხაძემ განაცხადა.

გედევან ფოფხაძის თქმით, პარტიებთან შეხვედრა და საკითხზე კიდევ ერთხელ მსჯელობაა აუცილებელი, რათა არ გაჩნდეს უკმარისობა, რომ პროცესში რომელიმე მხარემ საკუთარი მოსაზრებები ვერ დააფიქსირა. თუმცა, შეკითხვაზე, გადაიხედება თუ არა 2020 წლის საპარლამენტო არჩევნების ჩატარების წესი და საკანონმდებლო ორგანოს დაკომპლექტება მოხდება თუ არა პროპორციული წესით, ისე, როგორც ამას ინტერპარტიული ჯგუფი ითხოვს, ფოფხაძე აღნიშნავს, რომ ამ საკითხზე მმართველ გუნდში გადაწყვეტილება უკვე მიღებულია.

როგორც ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარის პირველი მოადგილე აცხადებს, თვითონ ერთ-ერთია უმრავლესობის დეპუტატთაგან, ვინც მაჟორიტარული სისტემის გაუქმებია წინააღმდეგია. მთავარ მიზეზად გედევან ფოფხაძე იმას ასახელებს, რომ მაჟორიტარული სისტემა უფრო სამართლიანია. მისი თქმით, ამ შემთხვევაში, ამომრჩეველი კონკრეტულ პიროვნებას აძლევს ხმას და არა პარტიას. გედევან ფოფხაძეს ასევე აუცილებლად მიაჩნია, 2020 წლის არჩევნების ძველი სისტემით ჩატარდეს. მისი თქმით, ამომრჩეველი წინასწარ უნდა იყოს ინფორმირებული იმის შესახებ, რომ მათი მაჟორიტარული ოლქი გაუქმდება. გედევან ფოფხაძის თქმით, იმ შემთხვევაში თუ ამომრჩეველი მსგავსი შეთავაზების შემდეგ მმართველი გუნდის წარმომადგენლებს მხარს მაინც დაუჭერს, მაშინ „ქართული ოცნება“ და საქართველოს პარლამენტი უფლებამოსილი იქნება, საარჩევნო სისტემა შეცვალოს.

„ჩვენ ყველა შემთხვევაში გვექნება პარტიებთან შეხვედრა, მაინც დავჯდებით და მაინც დავილაპარაკებთ. იქნება თუ არა მიღწეული კონსენსუსი ჩვენ მაინც არ უნდა გვქონდეს უკმარისობის განცდა რომ პროცესში რომელიმე მხარემ პოზიცია ვერ დააფიქსირა და არ უნდა იყოს განცდა, რომ უმრავლესობის მხრიდან მოლაპარაკებებისთვის კარი იყო ჩაკეტილი. რაც შეეხება საარჩევნო სისტემას, უმრავლესობის შიგნით ჩვენ მივაღწიეთ კონსენსუსს, შევთანხმდით და მაჟორიტარული სისტემის მომხრეები ვთმობთ ჩვენს პოზიციას. ხაზს ვუსვამ, ჩემთვის საარჩევნო სისტემა არ არის მიზანი, ჩემთვის მიზანია ძლიერი ქართული სახელმწიფოს შექმნა და რა ფორმებს გამოვიყენებთ ამისთვის არ აქვს მნიშვნელობა. მე არ მაქვს არანაირი უფლება, ჩავუკეტო ჩემი მაჟორიტარული ოლქი ვინმეს, იმიტომ, რომ, როდესაც მე მირჩევდა ამომრჩეველი, ის არ მირჩევდა, იმიტომ რომ გამეუქმებინა ეს ოლქი. ჩვენ წინასწარ უნდა ვუთხრათ ამომრჩეველს, რომ თქვენ კი გვირჩევთ მაჟორიტარად, მაგრამ ჩვენ მერე ამ მაჟორიტარულ ოლქებს გავაუქმებთ, იმიტომ, რომ ჩვენ ვფიქრობთ რომ ეს უკეთესია ქვეყნის მომავალი განვითარებისთვის. თუ ამის მერეც ამომრჩეველი მაინც მოგვცემს ხმას, ჩვენ უკვე მორალური უფლება გვექნება, ასეთი გადაწყვეტილება მივიღოთ“, - განაცხადა გედევან ფოფხაძემ.