მმართველმა გუნდმა საკონსტიტუციო რეფორმასთან დაკავშირებით ოპოზიციას კონსულტაციების გამართვა შესაძლოა, ცალ-ცალკე ფორმატში შესთავაზოს.

საზოგადოებრივის ინფორმაციით, საპარლამენტო უმრავლესობის მიერ გუშინ გამართულ სხდომაზე მოსაზრება გამოითქვა, რომ მმართველი გუნდი ოპოზიციონერებს ცალ-ცალკე შეხვდეს.

საზოგადოებრივთან საუბარში პარლამენტის ვიცე-სპიკერი გია ვოლსკი აცხადებს, რომ ცალკე შეხვედრები დაგეგმილი არ არის, მაგრამ თუკი ასეთი რამ იქნება, ეს პოლიტიკური დანაშაული არ არის.

"წინასწარი გეგმა ცალ-ცალკე შევხვდეთ და იქ ვისაუბროთ, განვაცალკევოთ და ა.შ. ვიღაცის მოსაზრებაა და მოწოდებებიც არის, რომ ვინც „ქართულ ოცნებას“ ცალკე შეუთანხმდება, ის სამშობლოს მოღალატეა. ზოგმა ასეთი სტილის განცხადებაც გააკეთა. მოლაპარაკებებისთვის ღია ვართ. შეხვედრა ცალ-ცალკე იქნება თუ ერთად, ამას მნიშვნელობა არ აქვს. ცალკე შეხვედრები დაგეგმილი არ არის, მაგრამ თუკი ასეთი რამ მოხდება, არ მიმაჩნია, რომ ეს პოლიტიკური დანაშაულია. მითუმეტეს, გადაცდომა“, - აღნიშნავს ვოლსკი.

კანონმდებლის ცნობით, უმრავლესობის მხრიდან ოპოზიციის მიმართ საარჩევნო ბლოკებსა და საარჩევნო ბარიერზე შეთავაზებები არ იქნება.

„ძალიან მკაფიოდ ვართ ჩამოყალიბებული და საზოგადოებასაც კარგად ესმის, რომ საზოგადოება ნებისმიერ პოლიტიკურ პარტიას არჩევნებისთვის რა რაოდენობის მანდატსაც მისცემს, პარლამენტში წარმოდგენილი იმ ზომით უნდა იყოს. რატომღაც, ბლოკის შექმნა გამოსავალი ჰგონიათ იმისათვის, რომ თუნდაც სხვადასხვა პოლიტიკური კონცეფციის მქონე პარტიების ლიდერები მაინც და მაინც ერთად გამოჩნდნენ, ვინაიდან სხვა წევრები არც ჰყავთ და ასე გარკვეულ დივიდენდს მიიღებენ. ეს შეიძლება მათთვის მართლაც მომგებიანი იყოს, მაგრამ სახელმწიფოსთვის წამგებიანია. სიტყვა დათმობა არ მომწონს, მაგრამ თუკი სასწორზე რაიმე დასადები საკითხი არსებობს, რომელიც სახელმწიფო ინტერესებით განისაზღვრება და იწონება, რა საკვირველია, უნდა დავთმოთ კიდეც“, - დასძინა ვოლსკიმ.

მმართველი გუნდი ოპოზიციურ პარტიებთან შეხვედრისთვის მზადყოფნას გამოთქვამს, თუმცა შეხვედრის დროსა და ფორმატს მიმდინარე კვირის ბოლომდე გაახმოვანებს.

მხარეებს შორის მოლაპარაკებების თემა საკონსტიტუციო ცვლილებებია, რომელიც პარლამენტმა ორი მოსმენით უკვე მიიღო. უმრავლესობის გადაწყვეტილებით, 2020 წელს, საქართველოში საპარლამენტო არჩევნები შერეული სისტემით 3 პროცენტიანი ბარიერის ფარგლებში ჩატარდება, ხოლო 2024 წლისთვის პროპორციული სისტემა ამოქმედდება.