"ევროპული საქართველოს" მერობის კანდიდატმა პარტიის მხარდამჭერ მოხალისეებთან ერთად, ღრმაღელის მეტროსთან მოქალაქეებს ფლაერები დაურიგა და აქციაზე მისვლა ურჩია, რომელიც 23 ივლისს გაიმართება.
"არა რუსულ ფაშიზმს საქართველოში", ამ სახელწოდების აქციის გამართვას პარტია აღმაშენებლის გამზირზე გეგმავს.
ელენე ხოშტარიას განცხადებით, მნიშვნელოვანია, ქართულმა საზოგადოებამ საქართველოს სახელით საუბრის უფლება მოძალადე, მარგინალურ ჯგუფებს არ მისცეს.
"ეს არ არის პარტიული საკითხი. ეს საზოგადოებრივი მნიშვნელობის მოვლენაა. ძალიან მნიშვნელოვანია ქართულმა საზოგადოებამ არ მისცეს უფლება საქართველოს სახელით ილაპარაკონ ადამიანებმა, ვინც არიან მოძალადეები. ვინც ემუქრებიან ადამიანებს გაუპატიურებით და ვინც ქადაგებენ სიძულვილს. ამ აქციის მთელი არსი არის არა მარგინალურ პატარა ჯგუფებთან ჯიბრი, არამედ ჩვენება ყველასთვის, რომ საქართველო არ არის სიძულვილის და ძალადობის ქვეყანა. ხელისუფლებას უნდა ვაჩვენოთ, რომ ჩვენ არ დავუშვებთ ძალადობის. თუ ხელისუფლება გადაწყვეტს, რომ ეს ჯგუფები გამოიყენოს კონფრონტაციისათვის, ცხადია, ეს მათი პასუხისმგებლობა იქნება", - განაცხადა ელენე ხოშტარიამ.