კონგრესის მიერ მომზადებული კანონპროექტი არის მტკიცე და ნათელი გამოხატულება, თუ რა განწყობა არსებობს აშშ-ში მათ მიმართ, ვინც ქვეყნების დემოკრატიულ პროცესებში ჩარევას ცდილობს, - ამის შესახებ საქართველოში ამერიკის შეერთებული შტატების ელჩმა იან კელიმ ამერიკის შეერთებული შტატების კონგრესის მიერ შეთანხმებულ კანონპროექტზე კომენტირებისას განაცხადა.
როგორც ელჩმა აღნიშნა, კონგრესის მიერ მომზადებულ კანონპროექტში მოხსენიებული ქვეყნები, გამოირჩევიან გამუდმებული მცდელობით, დაარღვიონ სხვა ქვეყნის სუვერენიტეტი და კანონპროექტიც მათ ქმედებაზე პასუხია.
"ჯერ ეს არ არის კანონი. კენჭი უნდა ეყაროს და შემდეგ ხელი მოაწეროს პრეზიდენტმა, თუმცა ეს არის ძალიან მტკიცე და ნათელი გამოხატულება, თუ რა განწყობა არის ამერიკაში მათ მიმართ, ვინც ცდილობს ჩაერიოს ქვეყნის დემოკრატიულ პროცესებში და დაარღვიოს ქვეყნის სუვერენიტეტი. განსაკუთრებით ის ქვეყნები, რომლებზეც საუბარია ამ კანონპროექტში, გამოირჩევიან, გამუდმებით აქვთ მცდელობა, დაარღვიონ სხვა ქვეყნების სუვერენიტეტი და ზუსტად ეს არის ამის საპასუხო ქმედება. ჩვენ საქართველოს მთავრობასთან გვქონდა მჭიდრო კავშირი და განვიხილეთ ის საკითხები, რომ აღნიშნულმა არ დააზიანოს რაიმენაირად ჩვენი პარტნიორი ქვეყნების ინტერესები. პირიქით ეს მიმართულია მათ დასაცავად", - განაცხადა ელჩმა.
ამერიკის შეერთებული შტატების კონგრესის მიერ შეთანხმებულ კანონპროექტში, რომელიც რუსეთის წინააღმდეგ სანქციების დაწესებას ითვალისწინებს, საქართველოზეც არის საუბარი.