კოალიცია „დამოუკიდებელი და გამჭვირვალე მართლმსაჯულებისთვის“ წევრები იუსტიციის უმაღლესი საბჭოს გადაწყვეტილებას აკრიტიკებენ. კოალიციის სახელით არასამთავრობოების მიერ გავრცელებულ ერთობლივ განცხადებაში იუსტიციის უმაღლესი საბჭოს 24 ივლისის ის გადაწყვეტილებაა გაკრიტიკებული, რომლითაც თბილისის საქალაქო სასამართლოს სისხლის სამართლის კოლეგიის თავმჯდომარეობიდან გიორგი ებანოიძის გათავისუფლება მოხდა.

არასამთავრობოების შეფასებით, ებანოიძე თანამდებობიდან ყოველგვარი საფუძვლის გარეშე და პროცედურების დარღვევით გაათავისუფლეს. არასამთავრობოების განცხადებაში წერია, რომ ეს საკითხი სხდომის დღის წესრიგში არ ყოფილა, თუმცა სხდომის ბოლოს საქალაქო სასამართლოს ახალდანიშნულმა თავმჯდომარემ ვასილ მშვენიერაძემ დააყენა საკითხი, რომ საქალაქო სასამართლოს სისხლის სამართლის კოლეგიას შეერთებოდა საგამოძიებო და წინასასამართლო სხდომის კოლეგია. ამ კოლეგიების გაერთიანებით კი მოხდებოდა სისხლის სამართლის საქმეთა კოლეგიის განტვირთვა. კოლეგიების გაერთიანების შემდეგ კი მოხდა სისხლის სამართლის კოლეგიის თავმჯდომარის თანამდებობიდან გათავისუფლება. მისი მოვალეობის შემსრულებლად კი საგამოძიებო და წინასასამართლოს სხდომის კოლეგიის მოვალეობის შემსრულებელი ბადრი შონია დაინიშნა.

არასამთავრობოები ფიქრობენ, რომ კოლეგიების გაერთიანების რეალური მიზეზი სწორედ გიორგი ებანოიძის გათავისუფლება იყო, რადგან საქმეების გადატვირთულობისა და გაჭიანურების პრობლემა სხვა კოლეგიებშიც არსებობს, თუმცა ამ კოლეგიების ხელმძღვანელები არ გათავისუფლებულან.

„ადამიანის უფლებების სწავლებისა და მონიტორინგის ცენტრის“ ხელმძღვანელის სოფო ვერძეულის შეფასებით, გიორგი ებანოიძის გათავისუფლების ერთ-ერთი მიზეზი შესაძლოა ის ფაქტი იყოს, რომ ებანოიძე სასამართლოს გავლენიან ჯგუფებთან დაახლოებული პირი არ არის.

არასამთავრობო ორგანიზაციებში ფიქრობენ, რომ იუსტიციის უმაღლესი საბჭოს ახალი შემადგენლობაც მათი წინამორბედების პრაქტიკას აგრძელებს, როდესაც ყოველგვარი დასაბუთების გარეშე და პროცედურული დარღვევებით ხდება მოსამართლეების დანიშვნა და გათავისუფლება.

გიორგი ებანოიძის გათავისუფლების საკითხის გადახედვაზე იუსტიციის უმაღლესი საბჭოს არამოსამართლე წევრი ნაზი ჯანეზაშვილი აპირებს საბჭოს მიმართოს. ჯანეზაშვილმა, საბჭოს კიდევ ორ წევრთან ვახტანგ მჭედლიშვილთან და ირმა გელაშვილთან ერთად ებანოიძის გათავისუფლებას მხარი არ დაუჭირეს. ნაზი ჯანეზაშვილის შეფასებით, ეს გადაწყვეტილება მართლაც შეიცავს სამართლებრივ ხარვეზებს და კითხვებს აჩენს, თუმცა ებანოიძის გათავისუფლების მიზეზებზე ის ვერ საუბრობს.

თბილისის საქალაქო სასამართლოს სისხლის სამართლის კოლეგიის თავმჯდომარედ გიორგი ებანოიძე 5 წლის ვადით 2016 წელს დაინიშნა. ის საქალაქო სასამართლოში მოსამართლედ აგრძელებს მუშაობას.