კონსტიტუციაზე კონსენსუსი მიღწეული უნდა იყოს საქართველოს პოლიტიკურ ძალებს შორის,- ამის შესახებ ნათქვამია ვენეციის კომისიის პრეზიდენტის ჯანი ბუკიკიოს წერილში, რომელიც „ნაციონალური მოძრაობის“ სახელზეა გამოგზავნილი.

​„პატივცემული ოპოზიციის წარმომადგენლებო, დიდი მადლობა თქვენი ახალი წერილისთვის. ვენეციის კომისია საკუთარ პოზიციაზე რჩება, რომ გამოსავალი ნაპოვნი უნდა იქნეს დიალოგის გზით, რათა მიღწეულ იქნას ფართო კონსენსუსი.

კონსენსუსი მიღწეული უნდა იყოს საქართველოს პოლიტიკურ ძალებს შორის. ამავდროულად, ის უნდა ეფუძნებოდეს ვენეციის კომისიის შეხედულებას. კომისიის როლი ვერ იქნება სპეციფიური გამოსავლის მოძებნაში“,- აღნიშნულია ჯანი ბუკიკიოს წერილში.

15 ოპოზიციური პარტიის წერილი ვენეციის კომისიაში „ნაციონალური მოძრაობიდან“ გაიგზავნა.

ამასთან, ქართული ოპოზიციის მიერ გაგზავნილი წერილი და ასევე ჯანი ბუკიკიოს პასუხი, საზოგადოებრივს წერილზე ხელმომწერმა, „დემოკრატიული მოძრაობის“ წევრმა გიორგი ახვლედიანმა მიაწოდა.

რაც შეეხება წერილს, რომელიც ოპოზიციამ ვენეციის კომისიაში გააგზავნა, მისი შინაარსი ასეთია:

„ქართული ოპოზიციის ერთიანი მიმართვა ვენეციის კომისიას და ევროპულ სტრუქტურებს

გაცნობებთ, რომ საარჩევნო გარემოს გაუმჯობესებისთვის მიმდინარე პროცესი საქართველოში, უკვე მერამდენედ შედის ჩიხში. ოპოზიციური პარტიების მცდელობა, დაიწყოს მოლაპარაკებები ხელისუფლებასთან, საარჩევნო გარემოს ცვლილებასთან დაკავშირებით, „ქართული ოცნების“ მხრიდან წამოყენებული ულტიმატუმის გამო, კვლავ შეუძლებელი ხდება. აღსანიშნავია, რომ რამდენიმე დღის წინ ოპოზიციურმა პარტიებმა, კიდევ ერთხელ, ღია წერილით მიმართეს ხელისუფლებას, დაიწყოს მოლაპარაკებების პროცესი, მაღალი პოლიტიკური კონსენსუსის მისაღწევად. პასუხად კი, 19 ივლისს, ხელისუფლების შიდა კონსულტაციების შემდეგ, ცნობილი გახდა, რომ მმართველი გუნდი არ აპირებს ოპოზიციასთან საუბარს, იმ საკონსტიტუციო ცვლილებათა პაკეტზე, რომელიც წლის დასაწყისში, ოთხი თვის განმავლობაში განიხილა საკონსტიტუციო კომისიამ, რომელიც გამოტანილი იყო საჯარო-სახალხო განხილვის ფორმატში და ბოლოს გადმოგზავნილი იყო ვენეციის კომისიისთვის. ხელისუფლებამ, ვენეციის კომისიის დასკვნის შემდეგ , რომელმაც პოზიტიური შეფასება მისცა, საქართველოს პარლამენტის, 150-ვე დეპუტატის პროპორციული საარჩევნო სისტემით არჩევის ინიციატივას, ძირეულად შეცვალა საკონსტიტუციო ცვლილებების პაკეტი და პარლამენტში, კვლავ შერეული საარჩევნო სისტემის ინიცირება მოახდინა, რომელიც დაჩქარებული წესით, სამ დღეში, ორი მოსმენით დაამტკიცა კიდეც.
რამდენიმე კვირის წინ სტრასბურგში, „ქართული ოცნების“ ლიდერების მიერ გამართული კონსულტაციების შემდეგ, საქართველოს პარლამენტის თავმჯდომარემ ღიად განაცხადა, რომ მზადაა ოპოზიციასთან დიალოგისთვის, კონსენსუსის მისაღწევად. იგივე განაცხადა პრემიერ მინისტრმაც. სამწუხაროდ, ისევე როგორც საკონსტიტუციო ცვლილების, პაკეტის შემთხვევაში, ამჯერადაც ხელისუფლებამ შეცვალა პოზიცია და ოპოზიციასთან კვლავ ულტიმატუმის ენით დაიწყო საუბარი.

„ქართული ოცნება“ ოპოზიციას სთავაზობს დაეთანხმონ, შერეული საარჩევნო სისტემის დატოვებას, იმის სანაცვლოდ, რომ ხელისუფლება ერთჯერადად, ანუ 2020 წლის საპარლამენტო არჩევნებისთვის, პოლიტიკური ბლოკების შექმნას უფლებას დაუშვებს.
ჩვენი პრინციპული პოზიცია იყო და არის, შერეული სისტემიდან, სამართლიან პროპორციულ სისტემაზე (გადაუნაწილებელი მანდატების სამართლიანად გადანაწილების გათვალისწინებით) გადასვლა 2020 წლიდან. ასევე მთელი ოპოზიციური სპექტრი ვთანხმდებით იმაზე, რომ პროპორციული საარჩევნო სისტემის 2024 წლისთვის გადადება, არ შეიძლება!
კონსულტაციების დაწყებამდე ხელისუფლების მხრიდან, კვლავ ასეთი ულტიმატუმის ენით საუბარი, გვიჩენს საფუძვლიან ეჭვს იმასთან დაკავშირებით, რომ „ქართულ ოცნებას“ თავად აქვს გადაწყვეტილი დიალოგის პროცესი, დაწყებამდე ჩაშალოს, რაც ყოვლად მიუღებელია ოპოზიციისთვის, რომლის მიზანს საარჩევნო გარემოს გაუმჯობესება და კონსენსუსით მიღებული, საკონსტიტუციო ცვლილებები წარმოადგენს.
მოგმართავთ თხოვნით, საქართველოს ხელისუფლების წინაშე, თქვენთვის დამახასიათებელი პრინციპულობით, კიდევ ერთხელ დააყენოთ საკითხი, ჩვენი ქვეყნის უმთავრესი კანონის მიღებისას, უმნიშვნელოვანეს საკითხებზე, კონსენსუსის აუცილებლობის შესახებ“,- აღნიშნულია წერილში, რომელიც ვენეციის კომისიაში 15-მა ოპოზიციურმა პარტიამ გააგზავნა.