პოლონეთი სასამართლო რეფორმაში ევროკავშირის ჩარევას არ დაუშვებს,- განცხადება პოლონეთის იუსტიციის მინისტრმა გააკეთა. ზბიგნევ ზიობროს თქმით, ევროკომისიის პრეტენზიები გაუმართლებელი და ყოველგვარ საბაბს მოკლებულია.
თავის გამოსვლაში პოლონეთის იუსტიციის მინისტრმა მკაცრად გააკრიტიკა ევროკომისიის ვიცე-პრეზიდენტი ფრანს ტიმერმანსი. მისი თქმით, ტიმერმანსი წარმოშობით ჰოლანდიელია, ხოლო ნიდერლანდებს „მდიდარი კოლონიალისტური“ წარსული აქვს. ევროკომისია პოლონეთის მთავრობის მიერ ინიცირებული სასამართლო რეფორმის წინააღმდეგ გამოდის. ბრიუსელში მიიჩნევენ, რომ ეს რეფორმა სასამართლოს დამოუკიდებლობას საფრთხეს უქმნის. ევროკომისიამ ვარშავას კანონში ცვლილებების შესატანად ერთთვიანი ვადა მისცა, წინააღმდეგ შემთხვევაში კი სანქციებიც დაემუქრა.