ევრობასკეტის მოსამზადებელი ციკლის ფარგლებში საქართველოს ეროვნული ნაკრები თბილისის მერიის თასის გათამაშებაში მიიღებს მონაწილეობას.

ევროპის ჩემპიონატის წინ ეს ნაკრების ბოლო მატჩები იქნება თბილისში, რის შემდეგაც ეროვნული გუნდი საბერძნეთში, შემდეგ კი ისრაელში, ევრობასკეტზე გაემგზავრება. ნაკრებმა ღია ვარჯიში თბილისის სპორტის სასახლეში გუშინ ჩაატარა.

მერიის თასის ფარგლებში საქართველოსა და ჩეხეთის ეროვნული გუნდები 2 მატჩს გამართავენ - 11 და 13 აგვისტოს. ამ თამაშებში მოგებების და, თუ საჭირო გახდა, ბურთების შეფარდებით, გაირკვევა გამარჯვებული გუნდის ვინაობა, რომელსაც თბილისის მერიის თასი გადაეცემა.

მატჩები თბილისის სპორტის სასახლეში დღეს და 13 აგვისტოს, 18:00 საათზე გაიმართება, დასწრება გულშემატკივრებისთვის თავისუფალი იქნება. მატჩებს პირდაპირ ეთერში საზოგადოებრივი მაუწყებელი შემოგთავაზებთ.