ფოთის მაჟორიტარი დეპუტატის შვილის გარდაცვალების საქმეში ბრალდებულ პოლიციელებს სასამართლომ 1000-1000-ლარიანი გირაო შეუფარდა.

გორის რაიონულ სასამართლოში გამართულ პროცესზე ბრალდების მხარე 5-5 000-ლარიანი გირაოს განსაზღვრას ითხოვდა, თუმცა მოსამართლემ დაცვის მხარის შუამდგომლობა გაითვალისწინა.

ერთ-ერთი ბრალდებულის, შიდა ქართლის პოლიციის ასმეთაურის ადვოკატის განმარტებით, წაყენებულ ბრალს არცერთი პოლიციელი არ აღიარებს.

ყველა მათგანს სამსახურებრივი უფლებამოსილება უკვე შეუჩერდა. დაცვის მხარე ასევე ამბობს, რომ ბექა ხახუბიასთვის საპატრულო პოლიციის თანამშრომლებს გზა არ ჩაუხერგავთ. ადვოკატის თქმით, ეს იყო შეზღუდვა, რადგან გორის გვირაბთან სამმეტრიანი გასასვლელი დატოვეს.

ყოფილ პოლიციელებს- ნუკრი ხაბელაშვილს, გიორგი სადაღაშვილს და ზურაბ რუსიშვილს გაუფრთხილებლობით სიცოცხლის მოსპობას და სამსახურებრივი უფლებამოსილების გადამეტებას ედავებიან

ავარია გორის გვირაბთან ცენტრალურ მაგისტრალზე 17 მაისს მოხდა, ტრაილერთან შეჯახების შედეგად ბექა ხახუბია ადგილზე დაიღუპა.