ინტერნეტში რუსი ე.წ. პრანკერების მიერ გაკეთებული აუდიოჩანაწერი ვრცელდება. ვინმე ვოვანისა და ლექსუის მიერ გაკეთებულ რგოლში ორი მამაკაცის ხმა ისმის.
ვიდეოს ავტორების განცხადებით, მათ უკრაინის შინაგან საქმეთა მინისტრის სახელით გიორგი მღებრიშვილს დაურეკეს და საქართველოს შინაგან საქმეთა მინისტრს მიხეილ სააკაშვილის ექსტრადირება შესთავაზეს. პასუხად კი მინისტრმა საქართველოს ყოფილი პრეზიდენტი უცენზუროდ მოიხსენია და თქვა, რომ საქართველოში მიხეილ სააკაშვილი არ სჭირდებათ, დარჩეს სადაც არის, რადგან ქართულ მხარეს არ სურს მისი გმირად გადაქცევა.
პირი, რომელიც ჩანაწერის მიხედვით ქართველი ძალოვანი მინისტრია, აცხადებს, რომ საქართველოში ვითარება სტაბილურია, სააკაშვილის დაბრუნება კი მღელვარებას გამოიწვევს. მისივე თქმით, სააკაშვილის საკითხი მან პროკურორთან განიხილა. ასევე, ის აღნიშნავს, რომ პრემიერი მიხეილ სააკაშვილის ექსტრადირების საკითხზე უკრაინის პრეზიდენტსაც ესაუბრა და მკაფიოდ განაცხადა, რომ მიხეილ სააკაშვილის საქართველოში ექსტრადირება არ სურთ.