აზიურ ფაროსანასთან დაკავშირებით დასავლეთ საქართველოში არსებულ ვითარებას პენსილვანიის უნივერსიტეტის პროფესორი გრეგ კრავჩუკი ადგილზე ეცნობა. ამერიკის წამყვანი ენტომოლოგი საქართველოს, სურსათის ეროვნული სააგენტოს ინიციატივით და აშშ-ს საერთაშორისო განვითარების სააგენტოს (USAID) საქართველოს სასოფლო-სამეურნეო წარმოების ეფექტიანობის აღდგენის პროექტის (REAP) მხარდაჭერით ეწვია.
სურსათის ეროვნული სააგენტოს უფროსმა ზურაბ ჩეკურაშვილმა და საქართველოს სასოფლო-სამეურნეო წარმოების ეფექტიანობის აღდგენის პროექტის (REAP) წარმომადგენლებმა, ამერიკელ პროფესორთან ერთად დასავლეთ საქართველოში, ზუგდიდის და აბაშის მუნიციპალიტეტებში მავნებლისგან დაზიანებული ფართობები და სიმინდის ყანები მოინახულეს.
ვიზიტის ფარგლებში პენსილვანიის უნივერსიტეტის პროფესორი არსებული ვითარების ანალიზს გააკეთებს და საქართველოს მთავრობას შესაბამის რეკომენდაციებს მისცემს.
გრეგ კრავჩუკი პენსილვანიის უნივერსიტეტის პროფესორი, ენტომოლოგია, რომელიც აზიური ფაროსანას (halyomorpha halys) ბიოლოგიის შესწავლაზე, მისი გავრცელების და ბრძოლის ღონისძიებებზე მუშაობს ამერიკის შეერთებულ შტატებში, სადაც აღნიშნული მავნებელი 2001 წელს დაფიქსირდა და 2010 წელს აშშ სოფლის მეურნეობას 21 მლრდ დოლარის ოდენობის ზარალი მიაყენა.
ამერიკის მთავრობის მიერ გატარებული ღონისძიებების შედეგად აზიური ფაროსანას პოპულაცია მნიშვნელოვნად შემცირდა. აზიური ფაროსანა საქართველოში 2016 წელს გავრცელდა და განსაკუთრებული ზიანი მეთხილეობის დარგს მიაყენა.
აზიური ფაროსანას საწინააღმდეგოდ სურსათის ეროვნულმა სააგენტომ წამლობა 53 000 ჰექტარ ფართობზე ჩაატარა. შეწამვლითი სამუშაოები გრძელდება და თხილის პლანტაციების მიმდებარე ფართობებზე ზუგდიდის, აბაშის, მარტვილის, ხობის და სამტრედიის მუნიციპალიტეტებში აქტიურად მიმდინარეობს. საერთო ჯამში დაგეგმილია 30 ათასამდე ჰექტარის შეწამვლა.
"სურსათის ეროვნული სააგენტოს მიერ პროგრამის განხორციელება იყო ისეთ დონეზე კარგი, რა დონეზეც ეს შეიძლებოდა ყოფილიყო პირველ წელს. დღეს 2016 წელთან შედარებით არსებობს დახვეწილი მონიტორინგის სისტემა, რაც სამომავლოდ მავნებელთან ბრძოლის ეფექტიანი მეთოდების დანერგვას შეუწყობს ხელს. დღეს ჩვენ დავათვალიერეთ ფართობები და ვნახეთ რომ ის პრობლემები რომლებიც არსებობს თხილის სექტორში არ არის დაკავშირებული მხოლოდ აზიურ ფაროსანასთან. პრობლემას წარმოადგენს სხვა დაავადებებიც , რასთან დაკავშირებითაც საჭიროა ფერმერებმა კომპლექსური ღონიძიებები გაატარონ", - განაცხადა პენსილვანიის უნივერსიტეტის პროფესორმა გრეგ კრავჩუკიმა.