აფეთქების შედეგად დაზარალებულ ორ ოჯახს, რომელთა სახლები მთლიანად განადგურდა, აჭარის მთავრობა საკუთრებაში ბინებს სთავაზობს, - ამის შესახებ განცხადება აჭარის ფინანსთა და ეკონომიკის მინისტრმა რამაზ ბოლქვაძემ გააკეთა.
რამაზ ბოლქვაძის განცხადებით, ამ დროისთვის ყველა დაზარალებულ ოჯახს ალტერნატიული დროებით საცხოვრებლებში მოათავსებენ, მათთან შეთანხმების შემდეგ კი გადაწყვეტენ, გადასცენ ახალი ბინები საკუთრებაში, თუ ადგილზე აღადგინონ დანგრეული ფართები.
„საუბარია იმ ოჯახებზე, რომელთა სახლებიც განადგურდა, ის სახლები, რომლებიც აღდგენას ექვემდებარება, ჩაუტარდება რემონტი და ხარჯებს სახელმწიფო გაიღებს. ამ ეტაპზე დაზარალებულებს გავიყვანთ ალტერნატიულ ფართებში, გამოძიების პროცესის პარალელურად კი მათთან მოლაპარაკებები გაგრძელდება. ვთავაზობთ არჩევანს, გადავცეთ ახალი ბინები, თუ ადგილზე აღვადგინოთ დანგრეული შენობები. ამ ეტაპზე საუბარია ორ ოჯახზე, შესაძლებელია ოთხი ოჯახი, მაგრამ განადგურებულია ბოლომდე მხოლოდ ორი სახლი", - განაცხადა რამაზ ბოლქვაძემ.
აჭარის ფინანსთა და ეკონომიკის მინისტრის განცხადებით, სამინისტრო კანონით ვალდებული არ არის ანალოგიურ ობიექტებზე მონიტორინგი განახორციელოს.
"ჩვენი სამინისტრო არ არის ვალდებული განახორციელოს მონიტორინგი ანალოგიურ ობიექტებზე. კანონი არეგულირებს, რა პერიოდულობით უნდა განხორციელდეს მონიტორინგი, არის ვალდებულება სამ წელიწადში ერთხელ მოხდეს შემოწმება, თუ მანამდე რამე არის საეჭვო, პირველ რიგში უნდა გვაცნობოს თავად მფლობელმა", - განაცხადა რამაზ ბოლქვაძემ.
რა პრევენციული ზომები გატარდება შემთხვევის შემდეგ, რამაზ ბოლქვაძე კონკრეტულ ღონისძიებებზე არ საუბრობს, ის ვერც იმ მექანიზმებს ასახელებს, როგორ უნდა გამოვლინდეს უნებართვოდ მოქმედი ანალოგიური სადგურები და აცხადებს, რომ მონიტორინგს შესაბამისი მუნიციპალიტეტები გააგრძელებენ.