"ერთიანი ნაციონალური მოძრაობის" მმართველობის პერიოდში, მათი პირადი კეთილდღეობისთვის, მხოლოდ 4-5 წლის განმავლობაში 1 მილიარდ ლარზე მეტი დაიხარჯა, - ამის შესახებ დედაქალაქის მერმა დავით ნარმანიამ ზაალ უდუმაშვილის ბრალდების საპასუხოდ განაცხადა, რომელიც დედაქალაქის მთავრობას ბიუროკრატიული ხარჯების გაზრდაში ადანაშაულებს.
დავით ნარმანიას თქმით, დედაქალაქის მთავრობამ ბოლო ერთი წლის განმავლობაში ბიუროკრატიული თანხები შეამცირა.
"ბოლო ერთი წლის განმავლობაში 22 მილიონი ლარით დავზოგეთ ადმინისტრაციული ხარჯები, რომლებიც დაკავშირებული იყო საწვავთან, დანამატებთან და სხვა ხარჯებთან. არ დაავიწყდეთ მათი მმართველობის ეპოქა, როცა ფუფუნებაში ცხოვრობდნენ, მე მაშინ ეკონომიკის ექსპერტი ვიყავი და კარგად მახსოვს, ვითვლიდი ამ ციფრებს, თუ მათ მეხსიერება ღალატობთ შემიძლია მივაწოდო ეს თანხები და გამოვუქვეყნო", - განაცხადა დავით ნარმანიამ.
„ნაციონალური მოძრაობის“ მერობის კანდიდატმა ზაალ უდუმაშვილმა დღეს განაცხადა, რომ დედაქალაქის მთავრობაში ბიუროკრატიული ხარჯები გაზრდილია.