„სითი პარკთან“ მოლაპარაკებით ჩვენ ვერაფერს გავხდით, თუ მომავალი მერი უფრო მკაცრ ზომებს გაატარებს, ეს მხოლოდ მისასალმებელი იქნება - ამის შესახებ თბილისის მერმა დავით ნარმანიამ „ქართული ოცნების“ დედაქალაქის მერობის კანდიდატის კახა კალაძის მიერ „სითი პარკთან“ დაკავშირებით გაკეთებული განცხადების კომენტირებისას განაცხადა.

„სითი პარკთან“ ჩემი დამოკიდებულება ყველასთვის ცნობილია, ეს არის მკვეთრად უარყოფითი დამოკიდებულება მათი საქმიანობის და მტაცებლური პოლიტიკის მიმართ. ბუნებრივია, მკაცრი ზომები უნდა იქნას გატარებული, თუმცა, გასათვალისწინებელია ისიც, რომ ძალიან კაბალური ხელშეკრულებაა „სითი პარკთან" გაფორმებული. ჩვენ მოლაპარაკებით ვერაფერს გავხდით მათთან, არცერთი გონივრული წინადადება არ იქნა მათი მხრიდან მიღებული. თუ უფრო მკაცრი ზომები იქნება მომავალი მერის მხრიდან გატარებული, ეს მხოლოდ მისასალმებელი იქნება“, - განაცხადა დავით ნარმანიამ.


კახა კალაძემ აღნიშნა, რომ როგორც კი მერიაში შევა, მაშინვე დასრულდება ის უმსგავსობა, რაც პარკირებასთან დაკავშირებით ქალაქში ხდება.