აშშ-ისა და მისი მოკავშირეების მისამართით ნებისმიერ საფრთხეს მასობრივი სამხედრო პასუხი მოჰყვება, - ამის შესახებ აშშ-ის თავდაცვის მდივანმა, ჯეიმს მეტისმა განაცხადა.
აშშ-ის ეროვნული უსაფრთხოების საბჭო კორეის ნახევარკუნძულზე განვითარებულ მოვლენებთან დაკავშირებით პრეზიდენტსა და ვიცე-პრეზიდენტს ხვდება.
როგორც მეტისმა აღნიშნა, პენტაგონი მოქმედების მრავალ სამხედრო ვარიანტს განიხილავს და დონალდ ტრამპს ყველა ვარიანტის განხილვა სურს.
„ჩვენ მკაფიოდ ვაცხადებთ, რომ შეგვიძლია საკუთარი თავისა და ჩვენი მოკავშირეების - სამხრეთ კორეისა და იაპონიის დაცვა ნებისმიერი თავდასხმისგან. აშშ-ის ტერიტორიების, მათ შორის გუამის, ასევე ჩვენი მოკავშირეების მისამართით ნებისმიერ საფრთხეს მასობრივ სამხედრო პასუხს გავცემთ და ეს პასუხი იქნება ეფექტიანი და ყოვლისმომცველი“, - განაცხადა ჯეიმს მეტისმა.
დღეს ჩრდილოეთ კორეამ წყალბადის ბომბის წარმატებული გამოცდის შესახებ განაცხადა. ბირთვული ბომბის აფეთქებამ ჩრდილოეთ კორეაში 6,3 მაგნიტუდის მიწისძვრა გამოიწვია.
ფოტო: Getty Images