მაუწყებლობის შესახებ კანონში შესატან ცვლილებებზე მსჯელობენ პარლამენტის დარგობრივი ეკონომიკისა და ეკონომიკური პოლიტიკის კომიტეტის სხდომაზე.
შეხვედრა დახურულ კარს მიღმა მიმდინარეობს. კომიტეტის თავმჯდომარე რომან კაკულია არასამთავრობო სექტორისა და კერძო ტელევიზიების წარმომადგენლებს ხვდება.
განხილვის საგანი მაუწყებლის შესახებ კანონპროექტით გათვალისწინებული ახალი რეგულაციებია, რომლის ინიცირებაც პარლამენტში საგაზაფხულო სესიაზე მოხდა.
საზოგადოებრივი მაუწყებლის მიერ შემუშავებული პროექტის მიზანია მაუწყებლის სამეურვეო საბჭოსა და გენერალური დირექტორის უფლებამოსილებათა გამიჯვნა, მაუწყებლის საქმიანობის მარეგულირებელი ნორმების დახვეწა და მისი გამართული საქმიანობისთვის სათანადო საკანონმდებლო ნორმების შექმნა.
ცვლილებები ეხება რეკლამის და სპონსორობის საკითხს, ასევე შესყიდვების იმ ნაწილს, რომელიც გადაცემების, სერიალების, მხატვრული და დოკუმენტური ფილმების შეძენას უკავშირდება. კანონპროექტთან დაკავშირებით, რომან კაკულია პირველი არხის ხელმძღვანელობას გასულ კვირას შეხვდა.