მაუწყებლობის შესახებ კანონში შესატან ცვლილებებზე უნდა იმსჯელონ საფინანსო-საბიუჯეტო კომიტეტზე.
ცვლილება რამდენიმე მიმართულებით სიახლეს გულისხმობს. მათ შორისაა საზოგადოებრივი მაუწყებლის სამეურვეო საბჭოსა და გენერალური დირექტორის უფლებამოსილებების გამიჯვნა.
ცვლილებები ეხება კომერციულ რეკლამას და არეგულირებს სპონსორობის საკითხს. ინიციატივის მიხედვით, დასაშვები ხდება გასართობი გადაცემების, საერთაშორისო კონკურსების, ფესტივალების და სერიალების სპონსორობაც.
ერთ-ერთი ცვლილება ეხება შესყიდვების ნაწილს - დღეს არსებული რეგულაციებით, მაუწყებელი ყველა ტიპის შესყიდვას ახორციელებს სახელმწიფო შესყიდვების შესახებ კანონის მიხედვით, პარლამენტში ინიცირებული ცვლილებების თანახმად კი, რეგულაციები არ უნდა გავრცელდეს ისეთ პროდუქციაზე, როგორიცაა გადაცემები, მხატვრული და დოკუმენტური ფილმები.