ქარიშხალ „ირმას“ მოახლოების მოლოდინში ფლორიდის შტატში მოსახლეობის ევაკუაცია მიმდინარეობს. საერთო ჯამში, სახიფათო ზონიდან 6 მილიონზე მეტი ადამიანი უნდა გაიყვანონ. მე-5 კატეგორიად შეფასებული დამანგრეველი ქარიშხალი ფლორიდის სამხრეთ სანაპიროს უახლოვდება.

მაიამის ქუჩები მთლიანად დაცარიელებულია. ქალაქში ამ წუთებში ძლიერი წვიმაა.

ფლორიდის შტატის გუბერნატორმა რიკ სკოტმა განაცხადა, რომ ამ დროისათვის კარიბის ზღვასთან მდებარე ქალაქების მაგისტრალებზე გადაადგილება მოსახლეობისთვის განსაკუთრებით სახიფათოა, რამაც შესაძლოა მათი ევაკუაციის პროცესი შეაფერხოს.

„თუ თქვენ ახლა შტატის სამხრეთით იმყოფებით, მოგიწოდებთ, რომ დაუყოვნებლივ თავშესაფარს მიმართოთ. ახლა მაგისტრალებზე მანქანით გადაადგილება ყველაზე სახიფათოა“, - განაცხადა რიკ სკოტმა NBC-ისთან ინტერვიუში.

ქარიშხალმა კარიბის ზღვაში მდებარე კუნძულებს უკვე გადაუარა, რასაც 20-ზე მეტი ადამიანის სიცოცხლე ემსხვერპლა. სტიქია რამდენიმე საათის წინ თავს დაატყდა კუბას. ბოლო 80 წლის განმავლობაში ეს იყო ყველაზე ძლიერი ქარიშხალი, რომელმაც კუნძულ კუბას ჩრდილოეთ ნაწილს გადაუარა.

აშშ-ის სტიქიების კვლევის ბიუროს ინფორმაციით, ქარიშხალი 201 კმ/სთ სიჩქარით მოძრაობს.