ქარიშხალი „ირმა“ ფლორიდის შტატს მიუახლოვდა. სანაპიროზე ძლიერი შტორმია.

სინოპტიკოსების ცნობით, სტიქია კვლავ გაძლიერდა და მეოთხე კატეგორიას მიაღწია.

ქარიშხლის მოლოდინში ფლორიდის ხელისუფლებამ 6 მილიონზე მეტ ადამიანს ევაკუაციის რეკომენდაცია მისცა, თუმცა როგორც გუბერნატორმა 9 სექტემბერს საღამოს გამართულ პრესკონფერენციაზე განაცხადა, სტიქიური უბედურების ზონის დატოვება, ახლა უკვე გვიანია.

ამ დროისთვის არსებული ცნობებით, დროებით თავშესაფრეში 50 ათასი ადამიანი იმყოფება. ათასობით აბონენტი ელექტროენერგიის გარეშეა დარჩენილი. რეგიონში საგანგებო მდგომარეობის რეჟიმი მოქმედებს.

ფლორიდელებს ევაკუაციისაკენ პირადად დონალდ ტრამპმაც მოუწოდა.

შეგახენებთ, რომ ქარიშხალმა„ირმამ" მანამდე კარიბის ზღვის აუზში მდებარე კუნძულებს, ასევე პუერტო რიკოს და კუბას გადაუარა. დაღუპულია სულ მცირე 24 ადამიანი. დანგრეულია ათასობით სახლი.