თორნიკე ოქრიაშვილი მოედანს ხანგრძლივი შესვენების შემდეგ დაუბრუნდა და პირველივე შეხვედრაში თავი გოლით გამოიჩინა. რუსეთის პრემიერლიგის მე-10 ტურში მახაჩყალის "ანჟიმ" "კრასნოდარს" უმასპინძლა და დიდი ანგარიშით, 1:5 დამარცხდა.

მაჰაჩყალელთა 2 ქართველიდან გიორგი ლორია სათადარიგოებში იყო, ჯაბა ლიპარტია კი თამაშში 61-ე წუთიდან ჩაერთო.

ოდნავ გვიან, 75-ე წუთზე მოედანზე გამოჩნდა "კრასნოდარის" ქართველი ლეგიონერი ოქრიაშვილი - მან 7-თვიანი პაუზის შემდეგ პირველად ათამაშა და 79-ე წუთზე მეკარესთან პირისპირ გასულმა დაბრუნება გოლით აღნიშნა და საბოლოო ანგარიში დააფიქსირა.

ამ მოგებით "კრასნოდარი" 21 ქულით რუსეთის პრემიერლიგაში მეორე ადგილზეა, ხოლო "ანჟის" 7 ქულით ბოლოსწინა, მე-15-ეზე.