"ენფილდზე", ბრაზილიისა და ხორვატიის ეროვნულმა ნაკრებებმა ამხანაგური შეხვედრა გამართეს. ზლატკო დალიჩის ფეხბურთელები პირველ ტაიმში სრულ უპირატესობას ფლობდნენ. ლუკა მოდრიჩი და ივან რაკიტიჩი მოედნის ცენტრს აკონტროლებდნენ და ბურთსაც კარგად ათამაშებდნენ. პირველი ტაიმი მაინც უსახური გამოვიდა - ვერცერთმა ნაკრებმა კარში დარტყმა ვერ მოახერხა.

მეორე ტაიმში ნეიმარი მოედანზე ფერნანდინიოს ნაცვლად შევიდა. ტრავმის შემდეგ, ბრაზილიელმა პირველ შეხვედრაში მიიღო მონაწილეობა. გადამწყვეტი ლუკა მოდრიჩის მოედნიდან გასვლა აღმოჩნდა - ხორვატიამ მოედნის ცენტრი დათმო და ბრაზილიამ უპირატესობა მოიპოვა. პირველი გოლი 69-ე წუთზე გავიდა, როდესაც ნეიმარმა რამდენიმე ცრუმოძრაობით მცველები დააბნია და სუბაშიჩს შანსი არ დაუტოვა.ბრაზილიელებმა მეორე გოლი მსაჯის მიერ კომპენსირებულ დროში გაიტანეს - თავი რობერტო ფირმინომ გამოიჩინა და ბრაზილიამ ხორვატია 2:0 დაამარცხა.მომდევნო შეხვედრას ბრაზილია ავსტრიის წინააღმდეგ გამართავს. ხორვატია კი სენეგალს დაუპირისპირდება.