ბათუმში, კაჩინსკების ქუჩაზე მშენებარე კორპუსთან, სადაც რამდენიმე დღის წინ უბედური შემთხვევის შედეგად ორი მუშა გარდაიცვალა, რამდენიმე ათეული მუშა საპროტესტო აქციას მართავს. ისინი ამბობენ, რომ სამსახურიდან უმიზეზოდ, ყოველგვარი ახსნა-განმარტების გარეშე დაითხოვეს.
აქციის მონაწილეთა განცხადებით, გარდაცვლილ თანამშრომლებს პატივი მიაგეს, იმყოფებოდნენ პანაშვიდზე, დაკრძალვაზე, რის გამოც სამი დღის განმავლობაში სამსახურში ვერ გამოცხადდნენ და სწორედ ეს გახდა მათი გათავისუფლების მიზეზი.
კომპანიის წარმომადგენლებმა, მათივე განცხადებით, აუწყეს, რომ შეიცვალა მენეჯმენტი, სამშენებლო ფირმა, რომელიც თავის მუშახელს დაასაქმებს.
ამ დროისთვის აქციის მონაწილეებთან კომპანიის წარმომადგენლები არ გამოჩენილან. საცხოვრებელ კორპუსს ახალ ბულვარში კომპანია "მეტრო" აშენებს.
8 სექტემბერს ბათუმში მშენებლობაზე ორი მუშა დაიღუპა.