ხვალ 193 ქვეყნის ლიდერებს საქართველოს პრემიერი გაეროს ტრიბუნიდან მიმართავს. გამოსვლის წინ ნიუ იორკში მაღალი დონის შეხვედრები გრძელდება.
ცოტა ხნის წინ გიორგი კვირიკაშვილი მოლდოველ კოლეგას ესაუბრა. გაეროს გენერალური ასამბლეის 72-ე სესია საქართველოს დელეგაციისთვის ისტორიული მნიშვნელობისაა.
საქართველომ საფრანგეთისგან 75 ქვეყნისგან შემდგარი საერთაშორისო ფორუმის - „ღია მმართველობის პარტნიორობის“ თავმჯდომარეობა გადაიბარა.
საჯარო მმართველობაში მოქალაქეების აქტიური ჩართვა, ანტიკორუფციული რეფორმების გატარება და გამჭვირვალობა - პრემიერ-მინისტრის მიერ დასახელებული ამ პრიორიტეტებით საქართველო მაღალი დონის ორგანიზაციას ერთი წლით უხელმძღვანელებს.
ასამბლეის ფარგლებში პრემიერი კვირიკაშვილი ევროკავშირის უმაღლეს წარმომადგენელსაც შეხვდა. სწორედ ამ აუდიენციის დროს გაირკვა, რომ საქართველოს საკითხი ფედერიკა მოგერინიმ ამერიკის ვიცე-პრეზიდენტთან განიხილა.
ლიკა ხურციძე დეტალებით ნიუ იორკიდან.