გაეროს ტრიბუნიდან საქართველოს მისამართით მკაფიო გზავნილები ისმის. ლიტვა, ესტონეთი, პოლონეთი, სლოვაკეთი - გენერალურ დებატებზე ოთხივე ქვეყნის ლიდერების გამოსვლების ერთი ნაწილი საქართველოს მხარდამჭერ განცხადებებს დაეთმო.
პირველმა პირებმა ახსენეს 2008 წლის ომი და რუსეთს საერთაშორისო ვალდებულებები კიდევ ერთხელ შეახსენეს. თუ ბოლო წლების არქივს გადავხედავთ, საქართველოს ოკუპირებული ტერიტორიების საკითხი გაეროს გენერალური ასამბლეის სესიებზე აქტიურად დგას დღის წესრიგში.
სწორედ ტერიტორიული მთლიანობის აღდგენა და დეოკუპაციაა ერთ-ერთი მთავარი თემა, რისთვისაც ოფიციალური თბილისი ორგანიზაციის ტრიბუნას მუდმივად იყენებს.
განსაკუთრებული აქცენტი კეთდება დევნილთა საკუთარ სახლებში დაბრუნებაზეც. შესაბამისი რეზოლუციის მხარდამჭერთა რიცხვი გაეროში წლიდან წლამდე იზრდება.