ერაყის ქურთისტანის ავტონომიური რეგიონის ცენტრში, ქალაქ ერბილში მცხოვრები ქურთები დამოუკიდებლობის შესახებ რეფერენდუმის ჩატარებას ზეიმობენ.
მოსახლეობა ქუჩებში გავიდა ქურთებით დასახლებულ სხვა ქალაქებშიც. წინასწარი შედეგები ჯერ არ გამოცხადებულა, თუმცა როგორც მოსალოდნელია, რეფერენდუმის მონაწილეთა უმრავლესობა ქურთისტანის დამოუკიდებლობას მხარს დაუჭერს.
რეფერენდუმის მიმდინარეობისას ამომრჩეველთა აქტივობამ 72,16% შეადგინა. მაღალი აქტივობის გამო, საარჩევნო უბნებზე ხმის მიცემის პროცედურა ერთი საათით გახანგრძლივდა.
სულ 6800-ზე მეტი საარჩევნო უბანი იყო გახსნილი. ერაყის საზღვრებს გარეთ მცხოვრებ ამომრჩევლების ხმის მიცემა სპეციალურ ვებგვერდზე შეეძლოთ. ხმის მიცემის უფლება ქურთისტანის ავტონომიაში, ასევე ერაყის ხელისუფლებასა და ქურთებს შორის სადავო ტერიტორიებზე რეგისტრირებულ მოქალაქეებს ჰქონდათ - სულ ხუთ მილიონზე მეტ ამომრჩეველს.
ერაყის ხელისუფლება რეფერენდუმს არაკონსტიტუციურად მიიჩნევს და მის შედეგებს არ აღიარებს. რეფერენდუმის წინასწარი შედეგების გამოცხადებამდე ერაყის მთავრობამ ქურთებთან სადავო რეგიონებში სამხედრო დანაყოფები განათავსა.