„გვიახლოვდება აღმოსავლეთ პარტნიორობის ნოემბრის სამიტი, სადაც ჩვენ უნდა ვიცოდეთ, თუ რა პრაგმატულ წინსვლას გააკეთებს ქვეყანა და წამოიღებს უფრო მეტ დახმარებას სხვადასხვა სფეროებში, განსაკუთრებით, როგორიცაა თავდაცვა, როგორიცაა ენერგოუსაფრთხოება, როგორიც არის რეფორმების გატარებაში მხარდაჭერა“-განაცხადა ევროპულ და ევროატლანტიკურ სტრუქტურებში ინტეგრაციის საკითებში სახელმწიფო მინისტრმა ვიქტორ დოლიძემ პოლიტიკისა და გაფართოების მოლაპარაკებების ევროკომისართან იოჰანეს ჰანთან შეხვედრის დასრულების შემდეგ. შეხვედრა 26 სექტემბერს, ბრიუსელში, ევროკომისიაში გაიმართა. მხარეებმა აღმოსავლეთ პარტნიორობის სამიტისთვის მზადების საკითხები განიხილეს. სახელმწიფო მინისტრმა ინფორმაცია მიაწოდა ევროკომისარს ასოცირების შეთანხმების ფარგლებში განხორციელებული რეფორმების, ევროკავშირთან უვიზო მიმოსვლის პროცესის, ასევე, წესების დარღვევის პრევენციისკენ მიმართულ ღონისძიებებზე. იოჰანეს ჰანმა აღნიშნა საქართველოს, როგორც აღმოსავლეთ პარტნიორობის ინიციატივის მონაწილე ქვეყნის მიერ დაფიქსირებული მნიშვნელოვანი პროგრესი, ხაზი გაუსვა, რომ საქართველო არის რეფორმების განხორციელების მხრივ ლიდერი ქვეყანა და მადლიერება გამოხატა ევროკავშირის საერთო უსაფრთხოებისა და სამშვიდობო თავდაცვის პოლიტიკის (CSDP) ფარგლებში მიმდინარე ოპერაციებში საქართველოს მიერ შეტანილი წვლილისათვის.
ვიზიტის ფარგლებში ვიქტორ დოლიძემ, ასევე, შეხვედრები გამართა ევროკავშირის მეზობელ ქვეყნებთან ურთიერთობების გენერალური დირექტორატის (DG NEAR) გენერალური დირექტორის მოადგილეს კატერინა მატერნოვასთან, ევროპარლამენტის ვიცე-პრეზიდენტთან იოან მირჩეა პაშკუსთან და ევროკომისიის საბჭოს აღმოსავლეთ ევროპის კომიტეტში (COEST) ევროკავშირის წევრი ქვეყნების წარმომადგენლებთან. შეხვედრებზე ევროკავშირის დახმარებების დაგეგმვისა და ეფექტიანობის გაზრდის, ასევე, ევროინტეგრაციის პროცესის შესახებ საქართველოს მოსახლეობის ცნობიერების ამაღლების კუთხით ქმედითი ღონისძებების ჩატარების საკითხები, აგრეთვე, მიმდინარე რეფორმები და ეკონომიკური განვითარების პერსპექტივები განიხილეს.