ეროვნულ საფეხბურთო ლიგაში 28-ე ტურის შეხვედრა გაიმართა. თბილისში, მიხეილ მესხის სახელობის სტადიონზე თბილისის „ლოკომოტივმა" ბათუმის „დინამოს" უმასპინძლა და ანგარიშით 3:0 დაამარცხა.

ანგარიში პირველივე წუთზე ირაკლი სიხარულიძემ გახსნა და ეროვნულ ლიგაში 23-ე გოლი გაიტანა. მასპინძლებმა პირველ ტაიმში კიდევ ორჯერ აიღეს მეტოქის კარი: მე-10 წუთზე თბილისელთა უპირატესობა მამუკა კობახიძემ გაზარდა, ხოლო 37-ე წუთზე გიორგი დიასამიძემ საბოლოო ანგარიში დააფიქსირა 3:0.

"ლოკომოტივმა" 48 ქულა დააგროვა, მე-4 ადგილზეა და უახლოეს მდევარს "საბურთალოს" 5 ქულით უსწრებს. ბათუმელები კი 29 ქულით მე-8 ადგილზე იმყოფებიან.

დღეს კიდევ ერთი მატჩი გაიმართება: ქუთაისის "ტორპედო" "საბურთალოს" მიიღებს.

ტური ხვალ დასრულდება: გორში "დილა" საჩხერეს "ჩიხურას" უმასპინძლებს. მატჩის პირდაპირ ტელერეპორტაჟს 20:00 საათზე მეორე არხი შემოგთავაზებთ.