საზოგადოებრივ მაუწყებელთან დაკავშირებით, ჩვენი და ეუთო-ს სპეცწარმომადგენლის პოზიციები ერთმანეთს ემთხვევა - ამის შესახებ საქართველოს პარლამენტის თავმჯდომარის პირველმა მოადგილე თამარ ჩუგოშვილმა მედიის თავისუფლების საკითხებში ეუთო-ს წარმომადგენელთან ჰარლემ დეზირთან გამართული შეხვედრის შემდეგ აღნიშნა. თამარ ჩუგოშვილის ინფორმაციით, ჰარლემ დეზირთან გამართულ შეხვედრაზე საუბრის ერთ-ერთი მთავარი თემა სწორედ საზოგადოებრივი მაუწყებლის რეფორმა იყო.
თამარ ჩუგოშვილის თქმით, ეუთო-ს სპეციალური წარმომადგენელი საზოგადოებრივ მაუწყებელთან დაკავშირებით რეფორმის აუცილებლობას ხედავს.
„კონსტიტუციის ის ცვლილებები ძალიან პოზიტიურად იქნა შეფასებული, რომელიც მედიის საკითხებს, ინტერნეტის თავისუფლებასა და საზოგადოებრივი მაუწყებლის დამოუკიდებლობას ეხება.
საზოგადოებრივ მაუწყებელთან დაკავშირებით, ჩვენი და ეუთო-ს სპეცწარმომადგენლის პოზიციები ერთმანეთს ემთხვევა. ეუთო-ს სპეციალური წარმომადგენელი საზოგადოებრივ მაუწყებელთან დაკავშირებით რეფორმის აუცილებლობას ხედავს. კერძოდ, იმის საჭიროებას, რომ ეს მაუწყებლობა საზოგადოებისთვის უფრო მიმზიდველი იყოს და საზოგადოება ინფორმაციას უფრო მეტად მაუწყებლიდან იღებდეს.
მაუწყებლის დამოუკიდებლობაზეც იყო საუბარი, რაც ჩვენი საერთო ინტერესია. ამასთან, საუბარი "მაუწყებლობის შესახებ" კანონპროექტზეც იყო და ერთ-ერთი საკითხი, რომელსაც ეუთო აკვირდება, ეს კანონპროექტია და მათ საერთაშორისო ექსპერტების დასკვნას გავუზიარებთ, რომელიც პოზიტიურია“, - აღნიშნა ჩუგოშვილმა.