პარლამენტის თავმჯდომარის ირაკლი კობახიძის განმარტებით, მოლაპარაკება საპარლამენტო უმრავლესობასა და პრეზიდენტს შორის საკონსტიტუციო ცვლილებების მხოლოდ ორ საკითხთან დაკავშირებით გაიმართება. მისი განცხადებით, ეს საკითხებია ბონუსის გაუქმება და საარჩევნო ბლოკების ერთჯერადად დატოვება. ირაკლი კობახიძის თქმით, იმ შემთხვევაში, თუ პრეზიდენტი არ გაიზიარებს იმ საკითხებს, რომლებზეც ქართულ მხარესა და ვენეციის კომისიას შორის მოხდა შეთანხმება, მმართველი გუნდი პროცედურების დაცვით საბოლოოდ იმ პროექტს დაამტკიცებს, რომელიც ვენეციის კომისიასთან არის შეთანხმებული.

„დისკუსია კონსტიტუციასთან დაკავშირებით არის დასრულებული, რაც შეეხება მოლაპარაკებას, რომელიც გაიმართება დღეს უმრავლესობასა და პრეზიდენტს შორის, ის შეეხება იმ ორ საკითხს, რომელიც არის მოაზრებული ჩვენი და ვენეციის კომისიის ხელმძღვანელობის შეთანხმებით. აქ საუბარია ბონუსის გაუქმებასა და ბლოკების ერთჯერადად დატოვებაზე. თუ გაიზიარებს ამ ყველაფერს პრეზიდენტი და თუ ხელს შეგვიწყობს ჩვენ ვენეციის კომისიასთან მიღწეული შეთანხმების რეალიზებაში, ამ შემთხვევაში, მას შეუძლია, პოზიტიური წვლილი შეიტანოს ამ პროცესში. თუ ამას არ გაიზიარებს, ამ შემთხვევაში ბუნებრივია, ჩვენ ჩვენი პროცედურებით, ჩვენი ინიციატივით მაინც დავამტკიცებთ იმ ცვლილებებს, რომელიც შეთანხმებულია ვენეციის კომისიასთან“, - განაცხადა ირაკლი კობახიძემ ვენეციაში გამგზავრებამდე, სადაც ვენეციის კომისიის პლენარულ სხდომას დაესწრება.

მმართველი გუნდის წარმომადგენლები საკონსტიტუციო ცვლილებების პროექტთან დაკავშირებით გიორგი მარგველაშვილს პრეზიდენტის სასახლეში დღეს, 16:00 საათზე შეხვდებიან. უმრავლესობა ახლადმიღებულ კონსტიტუციაში ცვლილებების განხორციელებას გეგმავს, რომლის ფარგლებშიც ბონუსის სისტემის გაუქმება და 2020 წლის საპარლამენტო არჩევნებისთვის საარჩევნო ბლოკების ერთჯერადად დაშვება იგეგმება. „ქართული ოცნება“ პრეზიდენტს სთავაზობს, ვეტო საკონსტიტუციო ცვლილებებზე ამ ორი საკითხის გათვალისწინებით გამოიყენოს.