კომპანია "ალბატროსის" დამფუძნებელსა და თანამშრომლებს შორის შეხვედრა შეთანხმებით დასრულდა. მოლაპარაკებები, რომელსაც პროფკავშირების წარმომადგენლებიც ესწრებოდნენ, ორ საათს გაგრძელდა.
"ალბატროსის" თანამშრომლების პირობა იყო, გაათავისუფლონ დაცვის ის თანამშრომლები, რომლებსაც ისინი კომპანიის თანამშრომლების ცემაში ადანაშაულებდნენ. მოლაპარაკებების შედეგები კომპანიის დამფუძნებელმა ზაზა ჩხაიძემ და პროფკავშირების ხელმძღვანელმა ირაკლი პეტრიაშვილმა, შეხვედრის შემდეგ აქციაზე მყოფ თანამშრომლებს გააცნეს.
კომპანიის დამფუძნებლის განცხადებით, სამსახურიდან გათავისუფლდება დაცვის ის ორი თანამშრომელი, რომლებსაც კომპანიის თანამშრომლები ცემაში ადანაშაულებდნენ, კომპანიის წარმომადგენელი ლევან კერვალიშვილი კი, ვისთანაც აქციის მონაწილეების მხრიდან პრეტენზიები არსებობდა, გაერიდება პროცესს და ამ თანამშრომლებს მასთან არანაირი შემხებლობა არ ექნებათ.
ასევე, როგორც პროფკავშირების ხელმძღვანელმა განაცხადა, შეთანხმება მიღწეული იქნა ზეგანაკვეთურ მუშაობაზეც და სამუშაო პირობების გაუმჯობესებაზე. თანამშრომლები, რომლებიც დღეს დილიდან აქციას მართავდნენ კომპანიის ოფისთან, მოლაპარაკებების შედეგიდან გამომდინარე მუშაობის გაგრძელებას აპირებენ.
კომპანია "ალბატროსის" თანამშრომელთა ინფორმაციით, მუშებმა ხელმძღვანელობას კუთვნილი ანაზღაურების დაფარვა მოსთხოვეს, რის გამოც მათ მოგვიანებით დაცვის თანამშრომლები ფიზიკურად გაუსწორდნენ.