ბადრი პატარკაციშვილის ყოფილმა ბიზნესპარტნიორმა გიორგი ჯაოშვილმა სასამართლო პროცესზე “ტელეიმედის“ წილების გადაფორმებაზე ისაუბრა. ჯაოშვილმა განმარტა, რომ 2008 წლის თებერვალში, ის იძულებით მიიყვანეს სანოტარო ბიუროში, სადაც სამხედრო პოლიციის თანდასწრებით კომპანიის 70% -მდე წილის გადაფორმებაზე ხელი მოაწერინეს.

ჯაოშვილმა შემდგომ განვითარებულ მოვლენებზეც ისაუბრა. მან განაცხადა, რომ წლების წინ ტელეკომპანიაში სამეთვალყურეო საბჭოს თავმჯდომარე იყო, თუმცა ესთანამდებობაც იძულებით დაატოვებინეს. ჯაოშვილის ინფორმაციით, წილების გადაფორმების შემდეგ ის ფინანსურ პოლიციაში დაიბარეს, სადაც თანამდებობიდან წასვლაზე განცხადების დაწერა მოითხოვეს.

“დამიბარეს ფინანსურში, ამიყვანეს მეშვიდე სართულზე. შემდეგ ჩამიყვანეს მე-5 სართულზე. იქ უკვე 10-12 ადამიანი დამხვდა. მითხრეს, რომ განცხადება უნდა დამეწერა თანამდებობის დატოვებაზე. ვუთხარი, რომ ქონების გადაფორმებაზე უკვე მქონდა ხელი მოწერილი და ისედაც ახალი მმართველები შეიკრიბებოდნენ და ვერ ვხვდებოდი რა საჭირო იყო განცხადების დაწერა. რომ ნახეს არ ვწერდი განცხადებას, ჩამოვიდა უფროსი. ნოტაცია წამიკითხა. იქ შვილმა მიმიყვანა, რომელიც ქვემოთ მელოდებოდა, 19 წლის ბიჭი. უარის შემდეგ, ლიფტთან მოსაწევად გავედი, სადაც ერთმა კაცმა მკითხა, თუ ვისთან ერთად ვიყავი და ვუთხარი, რომ შვილი მელოდებოდა ქვემოთ. გავიაზრე, რომ ჩემ შვილს საფრთხე ემუქრებოდა და მივიღე გადაწყვეტილება განცხადების დაწერაზე", - განაცხადა ჯაოშვილმა.

7 ნოემბრის აქციის დარბევისა და ტელეკომპანია "იმედში" შეჭრის ეპიზოდებთან ერთად, ამ საქმეში გაერთიანებულია ქონების გასხვისების ეპიზოდიც.

საქმეზე ბრალდებულები არიან მიხეილ სააკაშვილი, ვანო მერაბიშვილი, გიგი უგულავა, დავით კეზერაშვილი და ზურაბ ადეიშვილი.