ჟენევის საერთაშორისო მოლაპარაკებების 41-ე რაუნდის პირველ დღეს, ევროკავშირის, გაერო-სა და ეუთო-ს მხრიდან თანათავმჯდომარეებთან და ამერიკის შეერთებული შტატების წარმომადგენლებთან ორმხრივი კონსულტაციები გაიმართა.
შეხვედრაზე მთავარი თემა საქართველოს ოკუპირებულ რეგიონებში ეთნიკური წმენდის გაგრძელება იყო. ამ კონტექსტში საქართველოს წარმომადგენლებმა მწვავედ დააყენეს სოფელ ერედვში განვითარებული მოვლენები, როცა რუსეთის საინვესტიციო პროგრამის ფარგლებში მასობრივად დაანგრიეს დევნილი ქართველი მოსახლეობის საცხოვრებელი სახლები.
განსაკუთრებული განხილვის საგანი იყო ასევე გალის რაიონში მცხოვრები ქართველების მძიმე სოციალური და ჰუმანიტარული მდგომარეობა.
შეხვედრაზე განსაკუთრებული აქცენტი გაკეთდა ოკუპირებულ ტერიტორიებზე უსაფრთხოების საერთაშორისო მექანიზმების შექმნისა და ადგილზე ადამიანის უფლებათა დაცვის საერთაშორისო ინსტიტუტების წვდომის აუცილებლობაზე.