თეთრი ხელჯოხის საერთაშორისო დღეს თბილისში უსინათლო და მცირემხედველ თანამოქალაქეთა მხარდამჭერი მსვლელობა გაიმართება. ღონისძიება 15 ოქტომბერს, 12:00 საათზე რუსთაველის ძეგლის მიმდებარე ტერიტორიიდან დაიწყება.

დღეს გამართულ პრესკონფერენციაზე, უსინათლოთა კავშირის წევრებმა შეზღუდული მხედველობის მქონე მოქალაქეების პრობლემებზე ისაუბრეს. მათი თქმით, მნიშნველოვანია ხელჯოხი ინდივიდუალური საჭიროების გათვალისწინებით შეირჩეს და მისი მოხმარების შესწავლა სპეციალიზებულ სოციალურ სარეაბილიტაციო ცენტრში მოხდეს, რასაც სახელმწიფო ვერ უზრუნველყოფს.

უფლებადამცველების განმარტებით, გაეროს შეზღუდული შესაძლებლობების მქონე პირთა უფლებების კონვენცია, რომელსაც საქართველოს პარლამენტი 2013 წელს შეუერთდა, მოითხოვს სახელმწიფოსგან მსგავსი ტიპის სოციალური სარეაბილიტაციო ცენტრების შექმნას.

თეთრი ხელჯოხის დღე მსოფლიოში 1969 წლიდან, საქართველოში კი 2011 წლიდან აღინიშნება. ამ დღის დაარსების იდეა ინგლისელ ფოტოგრაფს ჯეიმს ბიგსს ეკუთვნის, რომელმაც მხედველობა უბედური შემთხვევის შედეგად დაკარგა. ბიგსსი შეეცადა დაბრუნებოდა ცხოვრების ჩვეულ რიტმს და გადაადგილება საყრდენი ჯოხის საშუალებით სცადა, თუმცა საზოგადოება მას მხედველ ადამიანად აღიქვამდა და გამვლელები მას არაადეკვატურად აღიქვამდნენ. ყოფილმა ფოტოგრაფმა ხელჯოხი თეთრად შეღება, რამაც ის ხალხის მასაში გამოარჩია და საზოგადოების და მედიის ყურადღებაც მიიპყრო. მას მერე თეთრი ხელჯოხი - უსინათლო ადამიანის სიმბოლო გახდა და მთელს მსოფლიოში გავრცელდა.

თეთრი ხელჯოხის მოხმარების სისტემა და ტექნიკური სტანდარტები მე-20 საუკუნის 30-იანი წლებიდან თემისა და სპეციალისტების ერთობლივი მუშაობის შედეგად ჩამოყალიბდა.

უსინათლოთა პრობლემებზე მომუშავე არასამთავრობო ორგანიზაციების ინფორმაციით, საქართველოში არაოფიციალური ინფორმაციით, მხედველობის შეზღუდვის მქონე ადამიანთა რიცხვი 35-40 ათასამდეა, მათ შორის 5-6 ათასი უსინათლოა. მსოფლიოში მხედველობის პრობლემის მქონე 285 მილიონზე მეტი ადამიანია, აქედან 40 მილიონი უსინათლოა.