ავსტრიაში საპარლამენტო არჩევნები იმართება. საარჩევნო უბნები უკვე გაიხსნა და პირველმა ამომრჩევლებმა ხმა უკვე მისცეს. ბოლო სოციოლოგიური გამოკითხვებით, არჩევნებზე წარმატებას კონსერვატორებს და მათ 31 წლის ლიდერს სებასტიან კურცს უწინასწარმეტყველებენ.

ავსტრიის საგარეო საქმეთა მინისტრი და კონსერვატიული "სახალხო პარტიის" ლიდერი მოქალაქეებს დაპირდა, რომ არალეგალი მიგრანტები ავსტრიაში ვერ მოხვდებიან. სებასტიან კურცი ასევე გამოდის ინიციატივით, რომ სოციალური დახმარება მხოლოდ იმ უცხოელებმა მიიღონ, ვინც ავსტრიაში მინიმუმ 5 წელია ცხოვრობს.

თუ კონსერვატორები გაიმარჯვებენ, სებასტიან კურცი მსოფლიოში ყველაზე ახალგაზრდა ლიდერი გახდება.

მეორე ადგილისთვის იბრძვიან სოციალ-დემოკრატები და ულტრამემარჯვენეები. დამკვირვებლების მონაცემებით, ულტრამემარჯვენე პარტია "თავისუფლების" წევრებს აქვთ შანსი, ავსტრიის მმართველ კოალიციაში მოხვდნენ. საარჩევნო კამპანიის დროს ერთ-ერთი მთავარი თემა არალეგალური მიგრაცია იყო.

რაც შეეხება სოციალ-დემოკრატებს, რომელთა ლიდერიც ავსტრიის მოქმედი პრემიერ-მინისტრი სებასტიან კერნია, სოციოლოგები ვარაუდობენ, რომ ისინი მესამე ადგილზე მოხვდებიან.

ავსტრიაში არჩევნებში მონაწილეობის უფლება 6.4 მილიონ მოქალაქეს აქვს. საარჩევნო უბნები თბილისის დროით 19:00 საათზე დაიხურება და სწორედ ამ დროს გახდება ცნობილი ეგზიტპოლის შედეგები.