თელავის ვაჟა-ფშაველას სახელობის სახელმწიფო დრამატულ თეატრში „მუსიკის საერთაშორისო ფესტივალი 2017“ დასრულდა. დასკვნით კონცერტზე მსმენელის წინაშე საფესტივალო ორკესტრი არიელ ცუკერმანის დირიჟორობით წარდგა.
ცნობილი პიანისტის, ელისო ვირსალაძის, მამიკონ ნახაპეტოვისა და ჩელისტი დიმიტრი პროკოფიევის მიერ შესრულებულმა ვოლფგანგ ამადეუს მოცარტისა და ლუდვიგ ვან ბეთჰოვენის კონცერტმა მსმენელის განსაკუთრებული მოწონება დაიმსახურა.
მუსიკის საერთაშორისო ფესტივალი თელავში 7-დან 15 ოქტომბრის ჩათვლით მიმდინარეობდა.
წლევანდელი ფესტივალი მისი დამფუძნებლის, გამოჩენილი ქართველი პიანისტის, ელისო ვირსალაძის სასცენო მოღვაწეობის 55 წლისთავს დაემთხვა. საიუბილეო თარიღთან დაკავშირებით, ელისო ვირსალაძე პრეზიდენტმა ბრწყინვალების ორდენით დააჯილდოვა.