ქალაქ კირკუკში მცხოვრები ქურთები ქალაქის დასაცავად ემზადებიან. სააგენტო Reuters-ის მონაცემებით, შეიარაღებული ქურთები ქალაქის ქუჩებში დადიან და აცხადებენ, რომ ერაყელი ჯარისკაცებისგან კირკუკის დასაცავად მზად არიან.
როგორც Sky Arabia იტყობინება, ქალაქში უკვე შეიქმნა ე.წ. თავდაცვითი რაზმები, რომლებიც ქალაქის კონკრეტული უბნების უსაფრთხოების დაიცავენ. პარალელურად ვრცელდება ცნობები, რომ ერაყის ქურთისტანის მთავრობამ კირკუკში ქურთული სამხედრო შენაერთი „პეშმერეგას“ სპეცდანიშნულების რაზმი გააგზავნა.
მანამდე ერაყის მედიამ გაავრცელა ცნობები, რომ ერაყის არმიამ კირკუკში მდებარე რამდენიმე სტრატეგიული ობიექტი ძალის გამოყენების გარეშე დაიკავა. ერაყის ქურთისტანში კი ამტკიცებენ, რომ ადგილი ჰქონდა რამდენიმე შეტაკებას.
შეგახსენებთ, რომ ერაყის პრემიერ-მინისტრმა ნავთობით მდიდარ კირკუკში სამხედრო ოპერაციის დაწყების შესახებ დღეს განაცხადა. როგორც ჰაიდერ ალ აბადი ამბობს ამ ოპერაციის მიზანი კირკუკში სტაბილურობის უზრუნველყოფაა.