მერიასთან არსებულ ზონალურ საბჭოში ინტერესთა შეუთავსებლობისა და კორუფციის რისკების პრევენცია ეფექტურად უზრუნველყოფილი არ არის, - ეს განცხადება “საერთაშორისო გამჭვირვალობა-საქართველოს” წარმომადგენელმა ლაშა სენაშვილმა ზონალური საბჭოს შესახებ მომზადებული ანგარიშის პრეზენტაციაზე გააკეთა.
სენაშვილის განმარტებით, 2014-2017 წლებში მთელი რიგი შემთხვევები დაფიქსირდა, როდესაც ზონალური საბჭოს წევრები, იქნებოდნენ ეს არქიტექტურის სამსახურის წარმომადგენლები, თუ მოწვეული ექსპერტები, პარალელურად არქიტექტურის სფეროს ბიზნესით აქტიურად იყვნენ დაკავებულები.
"ამასთან, ისინი ხშირად იმ განცხადებების ავტორებად გვევლინებოდნენ, რომელიც ამ ზონალურ საბჭოს უნდა განეხილა და დადებითი გადაწყვეტილება მიიღო. ბუნებრივია, ეს მაღალი კორუფციული რისკის მატარებელია და მერიამ ზედამხედველობა უნდა გააქტიუროს. საკვლევ პერიოდში ისეთ შემთხვევებსაც ვხვდებით, როდესაც ზონალურ საბჭოში განცხადებების შემტანებად ისეთ პირებს ვხვდებით, რომელიც წარსულში ან ახლა მმართველ პოლიტიკურ ჯგუფთან დაკავშირებულები არიან. წარსულში ეს ვალერი გელაშვილია, მოქმედი პოლიტიკოსებიდან კი იულიანე წულაია. ამავე პერიოდში ისინი მმართველი გუნდის შემომწირველებად გვევლინებიან. სულ ასეთი 11 შემთხვევაა, 11 შემომწირველის სასარგებლოდ ზონალურმა საბჭომ 10-მდე გადაწყვეტილება მიიღო. ასეთი შემთხვევებიც მაღალი კორუფციული რისკების მატარებელია", - განაცხადა ლაშა სენაშვილმა.
"საერთაშორისო გამჭვირვალობამ" საანგარიშო პერიოდში შეისწავლა ზონალური საბჭოს ის წევრები, რომლებიც არქიტექტურულ სამსახურს წარმოადგენენ.
"არქიტექტურის სამსახურის მაღალჩინოსნებსაც მათი ქონებრივი დეკლარაციების საფუძველზე ბიზნეს კავშირები კონკრეტულ კომპანიებში ჰქონდათ. ასევე ეს კომპანიებიც ზონალურ საბჭოში განმცხადებლად გვევლინებოდნენ. ისეთი შემთხვევაც გამოვლინდა, როდესაც კონკრეტულმა მაღალჩინოსანმა ნინო ღოღობერიძემ არქიტექტურული სამსახურის ხელმძღვანელის თანამდებობა დატოვა, კერძო სექტორში გადაბარგდა და ძალიან მალე არქიტექტურის სამსახურმა 4 განცხადება დაუკმაყოფილა. ფორმალურად რაც კანონმდებლობა გვაქვს ისინი კანონს არ არღვევენ, მაგრამ როდესაც მათ პირადი ბიზნეს ინტერესი აქვთ ამა თუ იმ პროექტის განსახორციელებლად და ზონალურ საბჭოშიც არიან კორუფციის მაღალ რისკებს აჩენს", -განაცხადა სენაშვილმა.
“საერთაშორისო გამჭვირვალობა-საქართველო” თბილისის მერიას მოუწოდებს, რომ ზონალურ საბჭოში, რომელიც თბილისის ტერიტორიების გამოყენებისა და განაშენიანების შესახებ დასკვნებს გასცემს, წევრები ისე შეარჩიოს, რომ კორუფციაზე კითხვები არ გაჩნდეს.