უცხოენოვანი წარწერების წინააღმდეგ "დემოკრატიული მოძრაობის" მერობის კანდიდატმა და პარტიის წევრებმა საპროტესტო აქცია გამართეს. კახა კუკავამ ვაკის პარკის მიმდებარე ტერიტორიაზე არსებულ სარეკლამო ბანერზე უცხოენოვან წარწერას ქართული შესატყვისი მიაწერა.
აქციის მონაწილეების განცხადებით, "რეკლამის შესახებ" საქართველოს კანონის თანახმად საქართველოს ტერიტორიაზე აბრებზე წარწერები სახელმწიფო ენაზე უნდა იყოს შესრულებული. უცხოენოვანი წარწერის შემთხვევაში აბრაზე ქართული წარწერაც უნდა იყოს დატანილი.
"მიუხედავად აღნიშნული წესისა, თბილისის უბნებში აბრები კანონდარღვევით, მხოლოდ ინგლისურ ან არაბულ ენაზეა განთავსებული. მერიის ზედამხედველობის სამსახური, რომლის კომპეტენციაც ამ საკითხის მონიტორინგია, არაფერს აკეთებს. ჩვენ შევახსენებთ ყველა ინვესტორს და კომპანიას კანონს "რეკლამის შესახებ" და ვაძლევთ ერთთვიან ვადას, რომ სარეკლამო აბრები მოიყვანონ კანონთან შესაბამისობაში,-"განაცხადა კახა კუკავამ.
ადგილზე იმყოფებოდა პატრულის ეკიპაჟი. აღნიშნულ ფაქტთან დაკავშირებით შეადგინეს შეტყობინების ოქმი, რომელიც რეაგირებისთვის მერიის ზედამხედველობის სამსახურს გადაეგზავნება.
"დემოკრატიული მოძრაობის" წევრების განცხადებით, ისინი მსგავსი ტიპის აქციის გამართვას ხვალ, აღმაშენებლის გამზირზეც გეგმავენ.