კატალონიის ხელისუფლება ავტონომიის გაუქმების გეგმას არ დათანხმდება. ეს განცხადება ადგილობრივი მთავრობის მეთაურმა კარლეს პუიჩდემონმა გააკეთა.

მისი შეფასებით, ესპანეთის პრემიერ-მინისტრის გადაწყვეტილება, ფრანკოს დიქტატურის შემდეგ, კატალონიის ინსტიტუტებზე განხორციელებული ყველაზე უხეში თავდასხმაა.

როგორც კატალონიის მეთაური ამბობს, ის უახლოეს ხანში მოიწვევს ადგილობრივი პარლამენტის საგანგებო სხდომას და მადრიდში მიღებულ გადაწყვეტილებაზე საპასუხო ნაბიჯის თაობაზე დებატები გაიმართება.

პუიჩდემონმა ინგლისურ ენაზეც გააკეთა განცხადება და ევროკავშირის მოქალაქეებს მიმართა. მისი თქმით, „ევროკავშირის ღირებულებებს დღეს კატალონიაში საფრთხე ემუქრება“.

მანამდე, ესპანეთის პრემიერ-მინისტრმა განაცხადა, რომ მადრიდი კატალონიის ავტონომიის გაუქმების მიზნით კონსტიტუციის 155-ე მუხლს აამოქმედებს. თუმცა მოგვიანებით, მარაინო რახოიმ განმარტა, რომ რეგიონული პარლამენტის დათხოვნას არ აპირებს და ამის ნაცვლად რიგგარეშე არჩევნების დანიშვნას გეგმავს. ამასთან, ესპანეთის პრემიერის თქმით, კატალონიის მთავრობის წევრებს, რომლებმაც „საკუთარი თავი კონსტიტუციაზე მაღლა დააყენეს“ თანამდებობიდან დაითხოვენ.

ესპანეთის მთავრობის ამ გეგმას უახლოეს დღეებში ესპანეთის პარლამენტში განიხილავენ, თუ სენატმა მას მხარი დაუჭირა, ის ძალაში შევა.

ესპანური მედია წერს, რომ ესპანეთის შინაგან საქმეთა სამინისტრო უკვე ემზადება კატალონიის რეგიონული პოლიციის უფროსის ჟოზეპ ლუის ტრაპეროს გადაყენებითვის, რის შემდეგაც ადგილობრივ სამართალდამცავ ორგანოებზე კონტროლს მადრიდი გადაიბარებს.

როგორც El Pais წერს ესპანეთის ცენტრალური მთავრობა კატალონიის საზოგადოებრივ მაუწყებელ TV3-ში შესვლასაც აპირებს.

მადრიდის ხისტი ნაბიჯები ბარსელონაში მკაცრად გააკრიტიკეს. გაიმართა ხალხმრავალი საპროტესტო აქცია. რომელშიც მილიონ ნახევარზე მეტი ადამიანი მონაწილეობდა.

შეგახსენებთ, რომ კატალონიაში დამოუკიდებლობის შესახებ ე.წ. რეფერენდუმი 1 ოქტომბერს გაიმართა,. 10 ოქტომბერს რეგიონული მთავრობის მეთაურმა კატალონიის „დამოუკიდებლობის დეკლარაციას“ მოაწერა ხელი, თუმცა განაცხადა, რომ დოკუმენტი ძალაში მადრიდთან დიალოგის დასრულებადე არ შევა. საპასუხოდ, ესპანეთის ცენტრალურმა ხელისუფლებამ ადგილობრივ მთავრობას ულტიმატუმი წაუყენა და ე.წ. დეკლარაციის გაუქმება მოითხოვა, რაზეც ბარსელონიდან უარი მიიღო.