საქართველოს საგარეო საქმეთა მინისტრის მიხეილ ჯანელიძე ბრიტანეთში ოფიციალური ვიზიტით იმყოფება.
მიხეილ ჯანელიძეს, დიპლომატებთან ერთად მანსონ ჰაუსში უმასპინძლეს, სადაც მისასალმებელი სიტყვების შემდეგ, მრგვალი მაგიდა გაიმართა. აქ ბიზნესის წარმომადგენლები საქართველოში საინვესტიციო პოტენციალს განიხილავდნენ.
ლონდონის სითის მერმა, ენდრიუ პარმლიმ შეხვედრისას აღნიშნა, რომ საქართველოში ბიზნესის კეთებისთვის ხელსაყრელი გარემოა. ლორდ-მერის აზრს იზიარებენ ის კომპანიებიც, რომლებსაც საქართველოში უკვე აქვთ ბიზნესი ან ბაზარზე შემოსვლას გეგმავენ.
"ჩვენ დაინტერესებულები ვართ საქართველოთი, იმ ფაქტიდან გამომდინარე, რომ ვგრძნობთ საქართველოს უსაფრთხო ქვეყანაა. თბილისში ვიზიტის შემდეგ ჩემთვის ნათელი გახდა, რომ საქართველო არის მთავარი გზა აზიისკენ, როგორც ინვესტიციის მთავარი წერტილი ყველა იმ საერთაშორისო ინვესტორისთვის, რომელიც რაღაც განსხვავებულს და უსაფრთხოს ეძებს. რა თქმა უნდა, ხშირად არის საუბარი რუსეთის საკითხზეც. მაგრამ ვფიქრობ, რომ საქართველოს მთავრობა კარგად ართმევს თავს ამ საკითხს. მე ვერ ვხედავ ამ საფრთხეს, მეტიც ვხედავ რუსულ ინვესტიციებს საქართველოში, როგორც განვითარებულ დემოკრატიულ ქვეყანაში. ჩემი, როგორც ინვესტორის ხედვაა, მიდით ნახეთ საქართველო"- აღნიშნა FEAR GROUP-ის ხელმძღვანელმა, სტეფან ფეარიმ.
მრგვალი მაგიდის ფორმატში მოწვეულ ბრიტანელ ბიზნესმენებს საქართველოს შესახებ პრეზენტაცია გააცნო ეკონომიკისა და მდგრადი განვითარების მინისტრის მოადგილემ, გენადი არველაძემ. ღონისძიებას ესწრებოდნენ ბრიტანული საინვესტიციო, ენერგეტიკული და ფინანსური წრეების წარმომადგენლები.
"საქართველოსა და გაერთიანებულ სამეფოს შორის ვაჭრობისა და ინვესტიციების გაღრმავების დიდი პოტენციალი არსებობს. ჩვენი მთავრობა უყურებს ინფრასტრუქტურის, განათლების, გარემოს დაცვით სფეროებს, ასევე ფინანსებს, ბანკებსა და საგადასახადო სერვისებს. ჩვენ დღეს ვართ ლონდონის გულში,ფინანსების მსოფლიო ცენტრში და როცა ამ თემებზე ვსაუბრობთ, ბრიტანეთი საუკეთესო ადგილია საქართველოს დახმარებისთვის"-აღნიშნა, - ბრიტანეთის სავაჭრო წარმომადგენელმა, მარკ პრიტჩარმა.
დიდ ბრიტანეთში საქართველოს საგარეო უწყების ვიზიტი ფარგლებში უკვე შედგა შეხვედრა გაერთიანებული სამეფოს სახელმწიფო მდივანთან, ბორის ჯონსონმთან.