თიანეთის მსგავსად სამართლებრივ სივრცეში ინაცვლებს მთაწმინდის მე-13 საარჩევნო უბნის გარშემო დაწყებული დავაც. ბლოკი ,,დემოკრატიული მოძრაობა-თავისუფალი საქართველო” უბნის შედეგების ხელმეორედ გადათვლას მოითხოვს. ამ მოთხოვნით პოლიტიკური სუბიექტი სასამართლოს ორი დღის ვადაში მიმართავს. მანამდე კი მთაწმინდის საოლქო კომისიაში მიმდინარე დღევანდელი სხდომა ხმაურის და ურთიერთბრალდებების ფონზე წარიმართა. კომისიის თავმჯდომარემ საჩივრის განხილვაზე უარი თქვა იმ მოტივით, რომ საჩივარი უბანზევე უნდა დაწერილიყო. მას შემდეგ, რაც ოლქში რაიონის გამომძიებელი მივიდა, ბლოკის წევრებმა უბნის შედეგების დალუქვის საკითხი დააყენეს, რაზეც კომისიის თავმჯდომარემ თანხმობა განაცხადა. ,,დემოკრატიული მოძრაობა-თავისუფალი საქართველოს” ლიდერების თქმით, საარჩევნო ბლოკს მე-13 უბანზე ნული ხმა დაუწერეს, თუმცა, მათივე მტკიცებით, 15-მა ადამიანმა მითითებულ უბანზე არჩევანი სწორედ ბლოკის სასარგებლოდ გააკეთა.