ევროპარლამენტმა შენგენის ზონაში უცხოელების კონტროლის ახალი სისტემა დაამტკიცა. ახალი დირექტივის მიხედვით, მესამე ქვეყნის მოქალაქეების შენგენის ზონის საზღვრებზე შესვლა და გასვლა ავტომატური რეგისტრაციის სისტემით მოხდება.
შენგენის ზონაში შესვლაზე უარს მესამე ქვეყნის მოქალაქეები ასევე ავტომატური სისტემით მიიღებენ. ევროკომისიის საკანონმდებლო ინიციატივას მხარი 477-მა დეპუტატმა დაუჭირა, 139 კი, წინააღმდეგ წავიდა. სისტემა ითვალისწინებს, რომ მესამე ქვეყნის მოქალაქემ საზღვარგარეთის პასპორტს სკანირებას გაუკეთებენ. ახალი სისტემის თანახმად, წესები გავრცელდება არა მხოლოდ მესამე ქვეყნების მოქალაქეებზე, არამედ იმ ქვეყნების მოქალაქეებზეც, რომლებსაც მოკლევადიანი ვიზიტებისთვის ევროკავშირთან უვიზო მიმოსვლა აქვთ. ახალ სისტემაში შეინახება, როგორც მგზავრების ბიომეტრიული მონაცემები, ასევე, გამოყენებული სამგზავრო დოკუმენტების ინფორმაციაც.
ევროკავშირში ფიქრობენ, რომ ახალი დირექტივების ამოქმედება გააძლიერებს შიდა უსაფრთხოებას და ტერორიზმთან ბრძოლას, ასევე, შეამცირებს სასაზღვრო კონტროლის გავლის დროსაც. დირექტივები ახლა ევროკავშირის საბჭომ უნდა დაამტკიცოს.