კატალონიის ავტონომიური რეგიონის მეთაურმა კარლეს პუიჩდემონმა სპეციალური ვიდეომიმართვისას განაცხადა, რომ ვადამდელი არჩევნების დანიშვნას არ აპირებს.

მისი თქმით, მან განიხილა ვადამდელი ადგილობრივი არჩევნების გამართვის შესაძლებლობა, თუმცა ამ იდეაზე უარი თქვა, რადგან ვერ ხედავს გარანტიებს, რომ ესპანეთის ხელისუფლება შეწყვეტს კატალონიაზე კონტროლის დამყარებისკენ მიმართულ „შეურაცხმყოფელ“ ქმედებებს.

„არ არსებობს გარანტიები, რომლებიც პარლამენტის ვადამდელი არჩევნების გამართვას გაამართლებდა“, - განაცხადა პუიჩდემონმა.

ბარსელონაში მიმართვისას, კატალონიის ლიდერმა ასევე განაცხადა, რომ კატალონიის რეგიონულმა პარლამენტმა უნდა გადაწყვიტოს, რა საპასუხო ქმედებებით უპასუხოს მადრიდს.

მადრიდში სენატორები შეიკრიბებიან და კატალონიის ავტონომიის დროებით გაუქმების მიზნით, კონსტიტუციის 155-ე მუხლის ამოქმედების შესახებ იმსჯელებენ.

კატალონიაში ვითარება პირველ ოქტომბერს ჩატარებული ე.წ. რეფერენდუმის შემდეგ დაიძაბა. ადგილობრივმა მთავრობამ 10 ოქტომბერს მიიღო ე.წ. კატალონიის დამოუკიდებლობის დეკლარაცია, რომელიც ძალაში მას შემდეგ უნდა შევიდეს, რაც მადრიდსა და ბარსელონას შორის დიალოგის რესურსი ამოიწურება. ესპანეთის მთავრობა ე.წ. რეფერენდუმის შედეგებს არ აღიარებს.